Монгол Улсын Ерөнхийлөгч Ц.Элбэгдорж өнөөдөр УИХ-ын чуулганы хуралдаанд оролцож Монгол Улсын Ерөнхий сайдад нэр дэвшигч, УИХ-ын гишүүн Жаргалтулгын Эрдэнэбатыг танилцууллаа. Монгол Улсын Ерөнхийлөгч Ц.Элбэгдорж хэлэхдээ “УИХ-ын дарга, эрхэм гишүүд ээ, УИХ-д олонхи болсон МАН Монгол Улсын Ерөнхий сайдад Жаргалтулгын Эрдэнэбатыг нэр дэвшүүллээ.

Монгол Улсын Үндсэн хуулийн 1 дэх хэсгийн 2 дахь заалтын дагуу Жаргалтулгын Эрдэнэбатыг Монгол Улсын Ерөнхий сайдаар томилуулах саналыг УИХ-д оруулж байна. Жаргалтулгын Эрдэнэбат нь Сэлэнгэ аймгийн Засаг дарга, УИХ-ын гишүүн, Сангийн сайдаар ажилласан. Тэрбээр 1974 онд Сэлэнгэ аймгийн Мандал суманд төрсөн. Худалдаа, үйлдвэрлэлийн дээд сургууль, Удирдлагын академи болон ХААИС төгссөн. Эдийн засагч мэргэжилтэй. Эхнэр, хүүхдүүдийн хамт амьдардаг. Жаргалтулгын Эрдэнэбат нь Монгол Улсын Ерөнхий сайдын албанд хууль, хариуцлага, ёс зүйг дээдэлж, эх орныхоо эрх ашгийг урьтал болгон тулгамдаж байгаа асуудлыг шийдвэрлэхийн төлөө санаачлагатай, эрч хүчтэй, бусадтай гар нийлэн ажиллаж чадна гэдэгт би итгэж байна. Жаргалтулгын Эрдэнэбатыг Монгол Улсын Ерөнхий сайдын албан тушаалд томилох асуудлыг хэлэлцэн шийдвэрлэж өгөхийг УИХ-аас хүсье. Анхаарал хандуулсанд баярлалаа” гэв.

УИХ-ын чуулганы хуралдаанд оролцсон гишүүдийн 97,1 хувийн саналаар Жаргалтулгын Эрдэнэбатыг Монгол Улсын Ерөнхий сайдаар томилов.