АСЕМ-ын зочдод зориулсан бэсрэг наадам Чингисийн хүрээ цогцолборт үргэлжилж байна. Наадмын нээлтийн өмнө Төрийн есөн хөлт цагаан тугийг заллаа. Үүний дараа наадмын үйл ажиллагааг нээж Ерөнхийлөгч Ц.Элбэгдорж үг хэллээ. Тэрбээр АСЕМ-ын зочидын хамт урд шөнө Франц улсад гарсан халдлагат өртсөн гэмгүй иргэдийн гэгээн дурсгалд зориулж эмгэнэл илэрхийлж, нэг минут чимээгүй зогслоо.

Тэрбээр үргэлжлүүлэн "Монголчуудын ёслол төгөлдөр, бахдалт их баяр наадмын дээжээс та бүхэндээ танилцуулж байна. Монгол бол найрсаг, нээлттэй улс. Ази, Европын дунд оршдог орон. Монгол оронг үргэлж дэмжиж байдаг хүндэт зочдод дахин талархал илэрхийлье. Монгол наадмын их ёслол, хүндэтгэлийн давтагдашгүй сайхныг та бүхэнтэй хуваалцаж байгаадаа бид баяртай байна. Эрхэм хүндэт зочид та бүхэн ч энэ бүхнийг хардаг азтай хүмүүс юм. АСЕМ-ын 20 жилийн тэгш ойд зориулсан Монгол үндэстний наадам эхэлснийг бид та бүхэндээ хүргэж байна” гэлээ.

Т.Энхэлээ