Гадаад хэргийн сайд Л.Пүрэвсүрэн АСЕМ-ын уулзалтын үр дүнгийн талаар мэдээлэл хийж байна.

Тэрбээр "АСЕМ-ын 20 жилийн ой тохиосон нь түүхэн үйл явдал боллоо. Идээдүйн 20 жилийн чигийг мөн гаргасан. Энэ талаарх судалгааны бүтээл гарсан байгаа. Европын төлөөлөгчид маш өндөр түвшинд оролцлоо. Европын улсуудын төлөөлөгчид ирсэн нь үнэхээр их ач холбогдолтой уулзалт болсоныг илтгэж байна. Өчигдөр террорист халдлагын эсрэг яриаг идэвхтэй өрнүүллээ. Англи болон Австралид тусгай асуудалтай байсан төлөөлөгчид нь ирсэн. Хоёр талын 100 гаруй уулзалт их болсон. АСЕМ-ын үеэр Монгол улс дэлхийн дипломатын төв байлаа. Үүнээс гадна бүртгэгдээгүй хэчнээн уулзалт яриа хөөрөө болсныг мэдэхгүй. Зохион байгуулагч орны хувьд бид үүн дээр маш том "тоглолт" хийх боломжтой байдаг. Аль аль төрийн тэргүүнийг хаана суулгах, хоол идэх, зураг авахуулахад хэнийг хэнтэй ойрхон суулгах гэх мэтчилэн. АСЕМ-ыг зохион байгуулахын тулд бид маш олон сургалт авсан. Аюулгүй байдал, цагдаа, тагнуулын байгууллагын ажилтнууд мөн нисэх буудлын холбогдох ажилтан алба хаагчид, дээд хэмжээний зочдод үйлчлэх жолооч нарыг хүртэл өндөр түвшний сургалтад хамрагдсан. Энэ бүх зүйл, мэдлэг Монголд үлдэнэАСЕМ-ын нийт уулзалт, хурлуудад 5600 гаруй хүн гаднаас ирж оролцсон. Зөвхөн дээд түвшний уулзалтаар гэхэд 2600 гаруй зочин Улаанбаатарт саатлаа.  Монгол Улсын зүгээс зохион байгуулалтад 9000 гаруй хүн оролцлоо. Дээр нь 1100 гаруй сайн дурынхан, аж ахуйн нэгж байгууллагууд, төрийн бус байгууллага гээд нийтдээ 20 мянга гаруй хүн АСЕМ-ыг сайн зохион байгуулахад гар бие оролцлоо. Та бүхэнд маш их баярлалаа. Уулзалтын үеэр хэд, хэдэн томоохон айлчлалыг бид зохион байгууллаа. Хотын хуучин дарга Э.Бат-Үүл даргын баг үйлчилгээний хэсгийг маш сайн зохион байгуулж ажилласан. Бэсрэг наадмыг үнэхээр сайн зохион байгуулсан" гэлээ.

- АСЕМ-ын дараагийн томоохон гадаад уулзалт, арга хэмжээ юу байх вэ?

- АСЕМ-д хөрөнгө зарцсаныхаа үр дүнг гаргах ёстой. Одоо Засгийн газар дараагийн гурван жилд зохион байгуулах гадаадын уулзалт, чуулганы товыг гаргах ёстой. Удахгүй дэлхийн Монголч эрдэмтний чуулган болно. Томоохон чуулга уулзалтууд ар, араасаа болно.

- Туркт болсон төрийн эргэлтийн асуудлаар ямар мэдээлэл байна вэ?

- Туркт 3000 гаруй монгол иргэн байдаг. Ихэнх нь оюутнууд. Анкара, Истанбул хотод байдал намжаагүй байна. Гэхдээ цэргийн эргэлт амжилтгүй боллоо гэдэг мэдээг хүлээн авч байна. Одоогийн байдлаар Туркийн бүх хил хаалттай байна. Бид тэнд амьдарч буй монголчууддаа анхааруулга хүргүүлж, сонор сэрэмжтэй байхыг сануулсан.

Т.Энхэлээ