Улсын баяр, АСЕМ зэрэг олон үйл явдлын үүд хаагдангууд Монголын улс төр бужигнаж эхэллээ. Тодруулбал, өнөөдөр МАН-ын Удирдах зөвлөл хуралдсан бол УИХ-ын сонгуульд арайхийж бүлэг байгуулах хэмжээний санал авсан АН-ын ҮЗХ мөн хуралдаж байна.

2016 оны сонгуульд МАН-ыг ард түмэн илт давуу сонгосон гэх боловч үнэн хэрэгтээ сонголтоо хийсэн ард түмэн сонгуулийн үр дүнд эргэлзээтэй байгаа нь нууц биш. Тиймдээ ч  АН-ыг ялагдуулахад “нууц” ноёнтоноор эрхэм ерөнхийлөгчийг ажилласан гэх бор шувуу аль хэзээний нисээд эхэлчихсэн. Үнэндээ бол АН-ын удирлага, эрхийг гартаа оруулахыг тулд АН-ыг энэ удаагийн сонгуульд ялагдал хүлээлгэсэн гэдгийг ч хэлэх хүн цөөнгүй байгаа. “Иднэ тат ард нь түүз” гэдэг шиг хоёр ч удаа ерөнхийлөгчийн сэнтийд өөрийг нь залсан намаа унагаагаад зогсохгүй, өөрийн хувийн нам болгохоор шийдсэн нь ил болж байх шиг.

Ойрын үйл явдлуудаас ажихад л ерөнхийлөгч өөрийн хөзрүүдээ ээлж дарааллаар гаргасаар байна. Тиймдээ ч АН дотор шинэчлэл гэдэг үг хамгийн их моодонд орж байгаа. Сүүлийн жишээ гэхэд АН-ын ахмадууд болох Э.Бат-Үүл, Да.Ганболд, Батбаяр/ Баабар/  нар ч АН-д шинэчлэл хэрэгтэй, АН-ын удирдлагыг бүхэлд нь залуу үедээ шилжүүлэх ёстой хэмээн уриалга гаргаж, сүрийг үзүүлсэн нь дээрээс шидсэн чулуу бөгөөд нөгөөх л АН-ын удирдлагыг авах гэсэн хөшүүрэг гэдгийг ч хэвлэлийнхэн онцолж байсан юм.

Тэгвэл тэдний хэлээд байгаа АН-ын шинэчлэгч залуус хэн бэ? Саяхан л “Харвард”-ын их сургуулийг зориод байсан С.Эрдэнэболд тэргүүтэй залуус болон ахмадуудыг намынхаа эсрэг турхирах байдлаар хүслээ биелүүлэхээр зэхэж эхэлсэн нь энэ юм. Мөн дээр нь АН-ын  МоАН санаачлага,  Нэг Ардчилал клубынхэн хоёулаа ерөнхийлөгчийн санаачилсан фракцууд. МоАН санаачлага гэгч гарснаар АН-ыг бутаргасан ч гэж хэлж болно. Тиймдээ ч МоАН фракцынхан АН-ын удирлагыг авах дараагийн нүүдлээ хийж эхэлжээ.

МоАН фракц сонгуулийн хуулийг өөрчилж, жижиг 76 тойрог байгуулахад онцгой гавьяа байгуулсан учраас ийнхүү намын удирлагыг авахаар мөн дайрч эхэлсэн байна. Нэг ардчилалынхан ч яахав олон удаа Ц.Элбэгдоржид ашиглагдсан. Хэлсэн ярьсандаа хүрдэггүй Ерөнхийлөгчөөсөө залхаж, түүнд гомдож тарж бутарч эхэлсэн нь нууц биш. Уг нь жил гаруйн өмнө АН-ыг шинэчлэх ёстой гэх залуус нэгдэж, АН-ын 25 жилийн ой баярын хурал дээрээ эсэргүүцэл илэрхийлж, “Хаалга цонхоо нээ, бүгчим байна” хэмээн шинэчлэл хэрэгтэй байгааг хэлж байсан. Гэвч тэдний энэхүү эсэргүүцэл “томчуудын” сүрд дарагдаж тэгэсхийгээд намжсан билээ.

Гэтэл өдгөө “эсэргүү” хэмээн цоллуулаад байсан залуусын үйл хэрэг, санаачлагыг гартаа авч АН-ын удирдлагыг авахаар санаархаж байгаа нь Ардчилсан намын гишүүд, дэмжигчдийн дургүйцлийг төрүүлээд байгаа юм. Тэгвэл өдгөө эрх мэдлийн төлөө, хэт нэг талыг барьсан нэг хүний шунал хүслээс шалтгаалж АН-ын мянга мянган гишүүд дэмжигчдийг гомдоож, итгэх итгэлийг нь салхинд хийсгэх бололтой.

24tsag.mn