Сангийн сайд Б.Чойжилсүрэн өчигдөр эдийн засгийн нөхцөл байдлын талаар олон нийтэд мэдээлэл өгсөн. Түүний өгсөн мэдээллээр эдийн засаг гүн хямралд орсон бөгөөд улсын төсөв хоёр их наядаар тасарч, нийт өр 23.5 тэрбумд хүрсэн гэж байгаа юм. Мөн 2012 онд 17,3 хувийн өсөлттэй байсан эдийн засаг энэ оны эцэст 1,3 хувьтай болж буурсан гэсэн. 

Тэгвэл өнгөрсөн дөрвөн жилд эрх баригч намын даргаар ажилласан З.Энхболд Сангийн сайд Б.Чойжилсүрэнгийн дээрх мэдээллийг үгүйсгэж өөрийн цахим хуудсаар дамжуулан мэдэгдэл хийжээ.

Тэрбээр мөн одоогийн Сангийн сайдад зөвлөгөө өгсөн байна.

Сангийн сайдад өгөх зөвлөлгөө:

1. Ажилтайгаа сайн танилцаж байж ТВ ярилцлагад орж бай.

2. Төсвийн алдагдал яг л урдах дөрвөн жилийнх шиг 1 их наяд төгрөг хэвээрээ байгаа. Жил болгон төсвийн ажлын хэсэгт орж ажилладаг байсан Б.Чойжилсүрэн гишүүн, Сангийн сайд асан одоогийн Ерөнхий сайд Ж.Эрдэнэбат нар мэдэхийн цаагуу мэдэж байгаа.

3. Ипотекийн 5 болон 8% зээл, "Сайн малчин, оюутан, хашаа, хувьцаа" хөтөлбөрүүдийн эх үүсвэр улсын төсөвт ордоггүй гэдгийг яамныхнаасаа асуугаад мэдэж болох байсан. Эдгээр бүх зээлийг авсан иргэд нь төлөхөөс улсын төсөв төлдөггүй. Эдгээр хөтөлбөрүүдийн ачаар нийт олгогдсон зээлийн 33%-ынх нь хүүг 2 оронтой тооноос 1 оронтой тоо руу шилжүүлсэн юм. Одоо та нар энэ зөв бодлогыг зогсоохын тулд улсын төсвөөс гардаг мэтээр, алдагдал хэтэрсэн мэтээр улс төр хийхээ зогсоож урдах ажил руугаа орно уу. Сонгууль дууссан.

4. Танай яам уг нь урд дөрвөн жил эхлүүлээд дуусгаж чадаагүй нэг ажлаас ажлаа эхлэх байж. Бидний үед дэд сайдуудыг цомхотгож эхлүүлсэн энэ ажлын нэр нь "төсвийн зарлагын реформ" юм. 2017 оны төсвийг батлахдаа нэг их наядын таналт хийж чадвал шинэ Сангийн сайдад баяр хүргэнээ.

Т.Энхэлээ