Засгийн газраас "Сайн" нэртэй дөрвөн хөтөлбөрийг зогсоосоныг эсэргүүцэж АН-ын дарга асан З.Энхболд Нийслэлийн Засаг дарга асан Э.Бат-Үүл нар мэдээлэл хийж байна.

Мэдээллийн эхэнд З.Энхболд Сангийн сайд Б.Чойжилсүрэнгийн мэдэгдэл нь эдийн засгийг гүн хямралд орууллаа гэдгийг тодотголоо. Тэрбээр "Жилийн эцэст төсөв 5 их наядын алдагдалд орно гэсэн нь дотоодод төдийгүй гадаадад Монголын нэр хүндийг унагаж эдийн засгийг улам доройтууллаа. Ийм алдагдал байхгүй. Манай улсын төсвийн алдагдал нэг их наяд төгрөг байгаа. Харин жилийн төсвийн орлого 7 их наяд. Үүнээс 5 их наяд нь орж ирэхгүй гэхээр энэ улсад татвар төлөх нэг ч аж, ахуй нэгж байхгүй болно. Тийм боломж үгүй. Боломжгүй зүйлийг ярьж байна. Монгол банкны Ерөнхийлөгч валютын нөөц улайссан гэж мэдэгдээд л долларын ханшийг 150 төгрөгөөр өсгөж байна" гэв.

Мөн ""Сайн" нэртэй хөтөлбөрүүдийг зогсоосон нь ард иргэдийг хорлосон үйлдэл боллоо гэв. Энэ хөтөлбөрүүдийг улсын төсвөөс санхүүждэггүй. Улсын төсөвт хамааралгүй явж ирсэн ажлыг хамааруулж улс төржүүлж зогсоолоо. Шинэ Засгийн газар ингэж ажиллаж болохгүй. Зүв зүгээр ажлыг зогсоож болохгүй. МАН-аас зохион байгуулалттайгаар гүжирдэж байна. Хэнд ч гай болохгүйгээр явж ирсэн хөтөлбөрүүдийг зогсоолоо. "Сайн оюутан" хөтөлбөрийн хүрээнд сургалтын төлбөрийн зээл авах гэж байсан 40-50 мянган оюутны мөрөөдөл талаар боллоо. "Сайн хашаа" хөтөлбөрт хамрагдаад ирэх өвөл байшингаа дулаалаад тухтай өвөлжих байсан олон айлын хүслийг нухчих дарлаа гэв. Энэ бол иргэдэд хэрэгтэй хөтөлбөр байсан. Өөрсдийгөө хямрал руу түлхдэг ийм түүх, тохиолдол олон улсад ч тэр Монгол улсад ч гарч байгаагүй. АН-ыг харлуулахын тулд эх орноо хорлож болохгүй" гэлээ.

Монгол банкны Ерөнхийлөгч эдийн засгийн ямар ч боловсролгүй хүн байна. Валютын нөөц хасах болно гэж хэзээ ч байдаггүй гэж Нийслэлийн Засаг дарга Э.Бат-Үүл хэллээ.

Тэрбээр " "Сайн хашаа" хөтөлбөрийг зогсооно гэдэг гэр хорооллыг утаагүй, хөрсний бохирдолгүй болгох ганц хөтөлбөр байсан. Гэр хороолол дахь бүтээн байгуулалтыг сэргээх гарц байсан. Сайн хөтөлбөрүүд ард иргэд рүү хөрөнгийн эх үүсвэрийг чиглүүлсэн ажил байсан. Одоо энэ ажлуудыг эрх мэдэлтэн рүү явуулж байна. Өөрсдөө эрх мэдлийг гартаа авч бизнесээ өргөжүүлэх гэж байна. Цахимаар газар өмчлүүлэхийг зогсоож буй нь үнэхээр хариуцлагагүй ажил. Одоо газрын наймаа цэцэглэж хүнд суртал нэмэгдэнэ" гэлээ.

Мөн Компани аж, ахуй нэгжүүдийн өрийг улсын өр мэтээр худал тайлбарлаж байна. Орон сууцны ипотекийн зээл хэрэгжсэнээр 80 мянган айл орон сууцтай болж инфляци буурсан. Бид ипотекийн зээлд 3 их наяд төгрөгийг зарцуулсан. Харин сайн хөтөлбөрүүдэд үүнээс бага мөнгө зарцуулах байсан гэв. 

Т.Энхэлээ