Мэргэжлийн Засгийн газартаа мэргэжлийн бус томилгоог явуулсан, төрийн нарийн бичгийн даргын албан тушаалыг наймаалцсан гэх МАН-ыг тойрсон шүүмжлэл намжаагүй байтал дахин нэг хэл ам дэгдэх нь. 90 жилийн түүхтэй улс төрийн ууган хүчин гэгддэг тус нам өнөөдрийг хүртэл гэмт хэрэгтэн, авлигач гишүүдээсээ салж чадахгүй байгаа нь ийн хэл ам дагуулах гол шалтгаан болж байна.

Цаашилбал, төрийн хариуцлагатай албан тушаалд нэр муутай, бүтэхгүй нөхдөө томилж давраадаг нь олны дургүйцлийг хүргэж байна гэж хэлж болно. Албан тушаалын бялуу хуваах ажиллагаа ид өрнөж буй энэ цагт МАН дотор “суудал” горьдогчид борооны дараах мөөг шиг олширч, хэн их мөнгө намдаа хандивласан тэр нь албан тушаалтай хоцорч буй сурагтай.

Харин зарим нь агсамнаж байгаад дарга болох замаа засч байгаа гэх мэдээлэл байна. Саяхны нэг өдөр УИХ-ын гишүүн, Хотын дарга асан “улаан хацарт” Ц.Батбаяр “Надад албан тушаал өгсөнгүй. Намайг албан тушаалгүй үлдээлээ” гэх утгатай гомдлын үгийг намынхандаа хэлж, агсамнасан сурагтай. Тэрбээр Хил хамгаалах Ерөнхий газрын дарга болохоор хөөцөлдөж байгаа гэнэ. Түүний хувьд нийслэлийн Засаг дарга, Өмч хувьчлалын комиссын даргаар ажиллаж байхдаа албан тушаалаа ашиглаж, улсад 605 сая төгрөгийн хохирол учруулсан хэргээр 2.1 жилийн хорих ялаар шийтгүүлж Мааньт дахь 415 дугаар ангид нэг жил ял эдэлж байгаад гарч ирсэн.

Түүний ялын хугацаа энэ сард дуусах байсан ч өнгөрсөн онд тэнсэнгээр суллагдсан юм. Өршөөлийн хуулиар тэнсэн харгалзах ял нь өршөөгдсөн ч ялтайд тооцогдох хугацаа нь дуусаагүй атал Хил хамгаалах Ерөнхий газрын даргын албан тушаалд санаархаж байгаа нь төрийн албаны тухай хуулийн 16 зүйлийн 16.2.1 дэх хэсэгт заасныг зөрчиж байгаагаа МАН-ынхан ч тэр, мандаж байгаа дарга нар ч дор бүрнээ мэдэж баймаар…

Хэрэв Ц.Батбаярыг энэ чигээр нь зүтгүүлж,  Монгол Улсын аюулгүй байдлын гол тулгуур болох Хил хамгаалах газрын даргаар томилчихвол наанадаж Монгол төрийн дархлаа  үгүй болно. Цаанадаж улс төр дагаж даргын албан тушаалд доншуучилсан дарганцарыг салбарынхан байтугай ард түмэн ихээхэн эсэргүүцэх биз.

Тэрбээр Хил хамгаалах Ерөнхий газрын дарга болохоор хөөцөлдөж байгаа гэнэ. Түүний хувьд нийслэлийн Засаг дарга, Өмч хувьчлалын комиссын даргаар ажиллаж байхдаа албан тушаалаа ашиглаж, улсад 605 сая төгрөгийн хохирол учруулсан хэргээр 2.1 жилийн хорих ялаар шийтгүүлж Мааньт дахь 415 дугаар ангид нэг жил ял эдэлж байгаад гарч ирсэн.

Ер нь улсын хөрөнгөөс хулгайлж шоронд хүртэл ял эдэлж явсан нөхөр дархан хилийг хамгаалдаг тусгай байгууллагад тэнцэнэ гэж ямар эрүүл ухаантай хүн дэнслэхэв дээ. Улсын хилийн нууцыг ийм хүнд атгуулж болохгүй гэдгийг холбогдох албан тушаалтнууд гадарладаг л байлгүй. Ёс зүй талаасаа ч байж боломжгүй үйлдэл. Өнөөдөр хил хамгаалах салбарт байлдагч, сонсогчоос ажлын гараагаа эхэлсэн олон шилдэг шудрага офицер бий. Бусад салбарыг бодоход мэргэжил, ур чадвараа системтэйгээр хамгийн сайн дээшлүүлсэн, ажлын арвин туршлага, сургамжтай, бүрэн хэмжээнд бэлтгэгдсэн боловсон хүчинтэй газар бол Хил хамгаалах салбар өөрөө. Салаан захирагчаас эхлээд шат дараалан ажилласан, доод тал нь 2 шатны цэргийн сургууль төгсч, академи дүүргэсэн, салбартаа нэр хүндтэй, хүлээн зөвшөөрөгдсөн олон офицер, генералууд байна. Харамсалтай нь, Мэргэжлийн хэмээх тодотголтой Засгийн газар нь онцлогтой хүчний салбартаа хүртэл нам дагасан л бол хамаагүй иймэрхүү нөхдийг томилохоор зүтгүүлж байгаа нь дархан хилээ манаж байгаа хилчдэд маань ямар үлгэр дуурайл болж ямар сэтгэгдэл төрүүлэхийг бодолцож байж томилгоогоо хийгээсэй.

Хүчний онцлог энэ салбарт мэргэжлийн нэр цэвэр, шударга, цэрэг эрсдээ үлгэр дуурайл болох хүнийг дэмжиж, зөв томилгоо хийгдэж гэмээ нь Монгол улсын аюлгүй байдал, торгон хил маань амар амгалан оршино.

Харин саяхан “аавынд” дээлээ нөмрөн сууж асан “Улаан хацарт” хочит Ц.Батбаяр улсын онцгой салбар Хил хамгаалах Ерөнхий газрыг удирдвал Монгол Улсын Засгийн газар, тэр тусмаа МАН-ыг боловсон хүчний нөөцгүй болж, дампуурлаа зарласан хэмээн ойлгож болох нь.

Улсад онц ноцтой хэрэг үйлдэж, шоронгийн хаалга татаж явсан ч онцгой салбарыг удирдаж болдог юм байна гэсэн гашуун түүхийг бичилцэх хэрэг байна уу, МАН-ынхаан...

24tsag.mn