МАН-ын бүлэг өдөржин хуралдаж сая тарлаа. Өнөөдрийн хуралдаанаар төрийн өндөр албан тушаалтан, төрийн захиргааны удирдах түвшний албан хаагчид болох аймаг, нийслэлийн Засаг даргын тамгын газар, яам, агентлагийн хэлтсийн даргаас дээш албан тушаалтан буюу ТЗ-8 ба түүнээс дээш, мөн АА-6 ба түүнээс дээш цалингийн шатлал, зэрэглэлээр цалинждаг албан тушаалтнуудын цалинг хасах шийдвэрийг болиулсан байна. Мөн 150 мкв-аас дээш талбайтай орон сууцнаас татвар авах НДШ-ийг нэмэгдүүлэх, хувь хүний орлогын албан татварыг 2,500,000 төгрөгт 25% болгох, 100 сая төгрөгөөс дээш хэмжээний хадгаламжтай хүнээс татвар авах зэрэг асуудлыг судлах ажлын хэсэг байгуулахаар болжээ. Цаашилбал, Оюутны 70,000 төгрөгийн тэтгэмжийг зогсоох /Оронд нь 90 тэрбум төгрөгийн сантай оюутны тэтгэлгийн сан байгуулах/ нэгдсэн байр сууринд хүрчээ.

Мөн зарим бараанд ногдуулах экспортын гаалийн татварын хэмжээ тогтоох тухай хуульд өөрчлөлт оруулах тухай хуулийн төсөл мөн  есөн асуудлыг хэлэлцэж саналаа нэгтгэжээ.

Өндөр албан тушаалтнуудын цалинг хасахгүй тансаг хэрэглээнээс татвар авах зарчмын шийдэлд хүрсэн талаар МАН-ын бүлгийн дарга Д.Хаянхярваа мэдээллээ.

Т.Энхэлээ