Монгол Улсын Ерөнхийлөгч Ц.Элбэгдорж есдүгээр сарын 19-24-ний өдрүүдэд АНУ-ын Нью-Йорк хотноо болох НҮБ-ын Ерөнхий Ассамблейн 71 дүгээр чуулганд оролцохоор болжээ. Тэрээр чуулганд оролцох үеэрээ Ерөнхий санал шүүмжлэлд оролцож, олон улсын харилцааны тулгамдсан асуудлаар Монгол Улсын байр суурийг илэрхийлж үг хэлэхээр болсон байна.

Мөн 2015 онд НҮБ-ын Дээд хэмжээний уулзалтаас баталсан тогтвортой хөгжлийн зорилтуудыг хэрэгжүүлэх чиглэлээрх олон улсын хамтын нийгэмлэгийн хүч чармайлтад хувь нэмрээ оруулж, үүрэг амлалтаа биелүүлэхээ нотлохын зэрэгцээ “Монгол Улсын тотвортой хөгжлийн үзэл баримтлал-2030”, үндэсний хөгжлийн зорилтуудаа дэлгэрэнгүй танилцуулахаар болжээ.

Ерөнхийлөгч Ц.Элбэгдорж есдүгээр сарын 21-ний өдөр болох НҮБ-ын Ерөнхий Нарийн бигийн даргын санаачилсан Өндөр түвшний арга хэмжээнд оролцож, Монгол Улс уур амьсгалын өөрчлөлтийн асуудлаарх “Парисын хэлэлцээр”-ийг соёрхон баталсныг мэдээлж, уг гэрээг нэн даруй хүчин төгөлдөр болгох, дэлхийн дулаарлыг бууруулах үүрэг амлалтаа хэрэгжүүлэхийн төлөө байгааг нотолж, олон улсын хамтын хүчин чармайлт нэн чухал болохыг онцлох аж.

Ерөнхийлөгч Ц.Элбэгдорж Ерөнхий Ассамблейн чуулганы үеэр НҮБ-ын Ерөнхий Нарийн бичгийн дарга, зарим улсын төр, засгийн тэргүүнтэй хоёр талын уулзалт хйиж, хамтын ажиллагааны асуудлаар ярилцахаар төлөвлөж байна.