АН-ын Үндэсний зөвлөлдөх хорооны хурал маргааш хуралдахаар товлогдоод байна. Тус нам өнгөрсөн сарын 25-ны өдөр хуралдана гэж байсан ч хойшлуулснаар ийнхүү маргааш хуралдахаар болсон юм. Эх сурвалжийн мэдээлж буйгаар маргаашийн ҮЗХ-ны хуралдаан ч мөн хойшилж магадгүй гэнэ. Хурлаар намын шинэчлэл, дүрмийг ярихаас гадна даргыг тодруулах юм. Тэгэхээр их, бага хэмжээний маргаантай асуудлууд хурлын дараа гарч мэдэх учир дахин хойшлуулж магадгүй юм байна. Товлосон ёсоороо хуралдаж намын даргаа сонголоо гэхэд намын даргад өрсөлдөөд ялагдсан нэг нь ялагдлаа хүлээн зөвшөөрч чадахгүй мэдэгдэл хийх төдий л АН-ын нэр хүнд дахин унах эрсдэлтэй. Орон нутгийн сонгууль хаяанд тулсан иргэдийн санаа бодол АН руу бага ч болов эргэсэн энэ үед “АН-ынхан хоорондоо эвдэрэлцэж, фракциуд нь албан тушаалын төлөө дахин зодолдож эхэллээ” гэх мэдээлэл тарвал сонгуульд ялалт байгуулах горьдлого талаар болно. АН-ынхан МАН шиг асуудлаа дотроо шийдэж чадах биш. ҮЗХ-оор хоорондоо эвдэрэлцэж түүнийгээ ил гаргах магадлал өндөр. Тиймээс орон нутгийн сонгуулийн өмнө ямар нэгэн асуудал үүсгэхгүйн тулд ҮЗХ-ны хурлыг түр хойшлуулах магадлалтай байна.

Хоёрдугаарт тус намыг ҮЗХ-ийн хурлаараа түр даргатай болно. Түр дарга нь намаа орон нутгийн сонгуульд амжилттай оролцуулах, намын даргыг сонгох Их хуралд бэлтгэх, намын дүрмээ шинэчлэх зэрэг субботник хийгээд өөрөө намын даргад өрсөлдөхгүй гэсэн мэдээлэл өчигдрөөс хэвлэлээр гарах болсон. Тэгвэл хэвлэлүүдээр бичээд буй түр даргын асуудал хоёр талтай гэдгийг тус намын гишүүд хэлж байна.

Хэрвээ АН нөгөөдөр ҮЗХ-ны хурлаа хийж чадаад намын даргаа сонговол тэр хүн нь субботник хийчихээд албан тушаалаасаа буух бус Их хурлаар эцэслэн сонгох даргын сунгаанд өрсөлдөх боломжтой гэнэ. Намын өмнөх дарга З.Энхболд үүрэгт ажлаасаа чөлөөлөгдөх өргөдлөө нэгэнт өгсөн учир ҮЗХ-оор дараагийн даргыг сонгож болно гэсэн дүрэмтэй.

Хэрвээ АН маргааш ҮЗХ-ны хурлаа хийж чадаад намын даргаа сонговол тэр хүн нь субботник хийчихээд албан тушаалаасаа буух бус Их хурлаар эцэслэн сонгох даргын сунгаанд өрсөлдөх боломжтой гэнэ. Тус намын хүчин төгөлдөр мөрдөгдөж буй дүрэмд ҮЗХ-ээр сонгогдсон дарга нь Их хурлаар сонгох даргын өрсөлдөөнд оролцож болохгүй гэх заалт байхгүй аж. Намын өмнөх дарга З.Энхболд үүрэгт ажлаасаа чөлөөлөгдөх өргөдлөө нэгэнт өгсөн учир ҮЗХ-оор дараагийн даргыг сонгож болно гэсэн дүрэмтэй.  Хоёр сарын хугацаанд намын даргаар ажиллаад өгчих өгөөмөр сэтгэлтэн АН дотор байхгүй гэдгийг ч хүмүүс мэднэ. Тэгэхээр ҮЗХ-ны хурлаас зөвхөн намын түр даргыг сонгоно.  Түр дарга нь Их хурлаар сонгох намын жинхэнэ даргын өрсөлдөөнд оролцож болохгүй гэдэг нь явцуу мэдээлэл бололтой. Түр даргын талаарх "бор шувууг" хэн, хаанаас нисгэв гэдэг нь тус намынханы анхаарлыг ихээхэн татаж байна. Тэгвэл намын даргад өрсөлдөөд ялагдчих магадлалтай гэж үзэж буй зарим гишүүд тус "бор шувууг" нисгэж буй бололтой. Тэд ҮЗХ-ны хурлаар сонгогдсон дарга нь арванхоёрдугаар сарын 6-нд болох Их хурал хүртэл нам дотроо байр, сууриа бэхжүүлж,  багаа үүсгэж өөртөө давуу байдал бий болгож ногоон гэрлээр дарга болох магадлалтай гэсэн хардлага тээж буй хүмүүс түр даргын яриаг гаргаж ирсэн байна.

АН-ын даргад УИХ-ын гишүүн Д.Эрдэнэбатаас гадна БСШУ-ны сайд асан Л.Гантөмөр, УИХ-ын гишүүн асан Г.Батхүү, УИХ-ын гишүүн Ж.Батзандан, УИХ-ын гишүүн Л.Болд, Ерөнхийлөгчийн тамгын газрын дарга асан П.Цагаан, Хотын дарга асан Э.Бат-Үүл нар өрсөлдөхөөр амбицаа илэрхийлж буй бололтой.

Тус нам арванхоёрдугаар сарын 6-ны өдрийн Их хурлаараа намын дүрмээ шинэчлэх бөгөөд шинэчилсэн дүрмээр намын даргыг ҮЗХ-аас биш Их хурлаар сонгохоор болгох аж. Намын шинэ дүрмээ баталсаны дараа даргаа сонгох юм байна. Харин дарга сонгох сонгуульд одоо ҮЗХ-ийн хурлаар сонгогдсон дарга өрсөлдөх бүрэн боломжтой нь хүчин төгөлдөр дүрмэндээ заасан хэмээн тус намын гишүүд тайлбарлаж байна.

Т.Энхэлээ