УИХ-ын гишүүн, АН-ын даргын орлон гүйцэтгэгч, орон нутгийн сонгуулийн менежер Д.Эрдэнэбат мэдээлэл хийлээ. Тэрбээр энэ үеэр АН орон нутгийн сонгуульд хариуцлагатай оролцоно гэдгээ мэдэгдэв. Тэрбээр энэ талаар "Орон нутгийн сонгуультай холбоотой эргэлзээ дагуулж буй нэг том асуудал бий. Энэ нь бүртгэл болоод шилжилт хөдөлгөөний асуудал юм. Нэг сонгогч олон газар санал өгөх магадлал өндөр гэдэг маргаан АН-д ирсэн. Тиймээс бид уг асуудалд анхаарч ажиллах болно. УИХ-ын 2016 оны сонгуулиар царцааны нүүдэлтэй холбоотой олон асуудал үүссэн. Үүний маргаантай холбогдуулж ҮХЦ-д гомдол үүсгээд явж байна. Би үүгээр юуг хэлэх гээд байна вэ гэхээр орон нутгийн сонгуулиар дээрх хууль зөрчсөн үйлдэл дахин битгий гараасай. Энэ бол бидний сонгуульд оролцох, иргэд зөв сонголт хийх ганц боломж юм" гэлээ.

Харин намынхаа шинэчлэлийн асуудлаар хэлэхдээ "ҮЗХ-г татан буулгана. Шинэчилсэн дүрэм одоогийн ҮЗХ-ны бүрэлдэхүүнээр батлагдахгүй. ҮЗХ одоо  шинэчилсэн дүрмийн ажлыг хэсгийн шинэчлэн байгуулна. Үүн дээр итгэлтэй байж болно. Тэгэхээр Их хурлаар шинэчилсэн дүрэм батлагдахад хуучин ҮЗХ-ны дүрмийн шинэчлэлийн хүрээнд татан буугдана. Бид бүх зүйлийг цоо шинээр эхлэх хэрэгтэй. АН шинэчлэлийг хөрсөн дээрээсээ эхэлнэ. АН 16 жилийн хоёр дахь амьсгалаа авах гэж байна. Одоо бид зөв амьсгал авах ёстой. Үүн дээр би хатуу байр суурьтай байгаа. АН алдаагаа засч 2016 оныг шинэчлэлийн жил байлгах болно. Намынхаа шинэчлэлийн асуудлаар 12 дугаар сарын 06-нд Их хурлаа хийхээр төлөвлөсөн. Ард түмэн АН-ыг шинэ даргатай бус шинэ дүрэмтэй болоосой гэж хүсч байгаа болов уу. Орон нутгийн сонгуулийн дараа намын шинэчлэлийн хэлэлцүүлгээ олон нийт, гишүүдийнхээ дунд хийнэ. Шинэчлэл гэдэг бол байнгын өсч дэвжиж явдаг процесс. АН-ын шинэчлэл шинэ даргыг сонгосноор дуусахгүй. Гэхдээ бид хуучин туулсан дүрэм, хуучин зовлонгоороо явахгүй. Энэ саадыг бид дахин давтахгүй" гэлээ.

Т.Энхэлээ