МАН Засгийн эрхийг барьсан даруйдаа төрийн албыг жинхэнэ утгаар нь төрлийн алба болгож байгааг ард түмэн харж байна. Эхний ээлжинд намын дарга М.Энхболд эрх, ямбаа эдэлж хүүгээсээ эхлээд ах, дүү, хамаатан садан, найз нөхдөө томилж болох бүхий л өндөр албан тушаалд томилсон. Харин одоо намынх нь гишүүд төрийн хариуцлагатай албан тушаалд ойр, дотны хүмүүсээ томилуулахаар орондоо орох завгүй гүйлдэж байна. МАН-ынханы ураг садны томилгооны “мод” өдрөөс өдөрт өргөжин илүү өргөн мөчиртэй болж өрсөлдөөн ч улам ширүүсэж байна гэж хэлж болохоор байна.
Хамгийн сүүлд л гэхэд УИХ-ын дэд дарга, УИХ-ын гишүүн Ц.Нямдоржийн хүү Гадаад харилцааны яамны ТЗУГ-ын дарга, Сангийн сайд асан Т.Очирхүүгийн хүү Монголбанкны тэргүүн дэд ерөнхийлөгч, УИХ-ын гишүүн Д.Лүндээжанцангийн дүү Төрийн банкны захирал боллоо. Мөн Хууль зүй, дотоод хэргийн сайд С.Бямбацогтын дүү Хөдөлмөр нийгмийн хамгааллын яамны газрын дарга, УИХ-ын гишүүн Т.Аюурсайханы эгч НДЕГ-ын дэд дарга, Шадар сайд У.Хүрэлсүхийн дүү Батлан хамгаалах яаманд газрын дарга, хотын мэр Су.Батболдын туслах нийслэлийн Хөрөнгө оруулалтын газрын дарга болсон гэх мэдээлэл байна. Мөн МАН-ын нөлөө бүхий гишүүд хүүхдүүдээ Монгол банкинд өндөр албан тушаалд томилсон. Энэ мэт ураг садны томилгоо өдөр, цаг, минуттай уралдан явагдаж байгааг шүүмжлэхээс аргагүй. Ер нь улс эх орны тулгамдсан асуудлаас илүүтэй томилгооноос өөр зүйл тус намынханд харагдахгүй байгаа бололтой.
Сүүлдээ МАН-ын эмэгтэй гишүүд хүртэл томилгоонд гар бие оролцож нөхөр, хүүхдээ албан тушаалтай болгохоор барьцаж эхэллээ. Зарим нь эхнээсээ хэргээ бүтээж буй бололтой.
Тодруулбал, УИХ-ын гишүүн Ц.Гарамжав хүргэн Ч.Алтаннарыгаа Оюутолгойн ТУЗ-ийн гишүүн болгов. Оюутолгойн ТУЗ-ийн шинэхэн гишүүн Ч.Алтаннар нь өмнө нь Оюутолгой компанид тодорхой хугацаагаар ажиллаж байсан туршлагатай аж. 2012 онд Ц.Гарамжавын том охинтой гэрлэсэн байна. Харин эрхэм гишүүн Ц.Гарамжав нь "Монполимет" группийн захирлаас УИХ-ын гишүүн болсон билээ.
Үүний өмнөхөн УИХ-ын гишүүн Б.Саранчимэгийн нөхөр “Чингис хаан” олон улсын нисэх буудлын дарга болж албан тушаал ахилаа. Уг томилгоо ч мөн олон нийтийн анхаарлыг ихээхэн татаад байна.
Уг мэдээлэлтэй зэрэгцэн УИХ-ын гишүүн Ц.Цогзолмаагийн нөхөр Ч.Саранжав ойрын өдрүүдэд МАН-ын дарга, УИХ-ын дарга М.Энхболд, Засгийн газрын хэрэг, эрхлэх газрын дарга Ж.Мөнхбатын ажлын өрөөний үүдийг сахиж өнжсөн сураг байгаа. Түүний хувьд Эрчим хүчний яамны Төрийн нарийн бичгийн даргад горилж буй мэдээлэл бий.
Ёс зүй, шударга үйл, хүнлэг энэрэнгүй байдлаар бусдыгаа манлайлж нийгэмд үлгэр дууриалал үзүүлэх ёстой эмэгтэй гишүүд нь ах, дүү хамаатан саднаа албан тушаалд томилохоос эхлээд намынхаа бохир муухайтай хутгалдан зарим зүйлд гар хөл нь болж буйг олон нийт шүүмжлэлтэй хүлээн авч байна.
24tsag.mn
Сэтгэгдэл (45)