Япон Улс руу Төрийн айлчлал хийхээр явах замдаа “Чингис Хаан” Олон Улсын нисэх буудалд түр саатсан Бельгийн Цог Жавхлант Ван Филипп, Хатан Матильда нарт өчигдөр буюу энэ сарын 10-ны өдөр Монгол Улсын Гадаад харилцааны сайд Ц.Мөнх-Оргил хүндэтгэл үзүүллээ.
Цог Жавхлант Ван Филипп, Хатан Матильда нар Улаанбаатар хотод хоёр цаг орчим саатсан бөгөөд энэ үеэр сайд Ц.Мөнх-Оргил ирсэн зочдод Монголын түүх, соёл, ард түмний ахуй заншлын талаар танилцуулсан юм. Мөн эдийн засгийн өнөөгийн нөхцөл байдал, цаашдын зорилтын талаар мэдээлэв. Монгол, Бельгийн харилцааны зарим асуудлаар товч ярилцаж, хоёр улсын харилцаа, хамтын ажиллагааг улам бүр өргөжүүлэн хөгжүүлэх эрмэлзлээ илэрхийлэв.
Уулзалтын төгсөлд сайд Ц.Мөнх-Оргил Ховд хотод төвлөрч буй “Баруун бүсийн оношилгоо, эмчилгээний төвийг сайжруулах төсөл”-ийг Бельгийн Засгийн газрын хөнгөлөлттэй зээлээр хэрэгжүүлж, хүн амд хүртээх эрүүл мэндийн үйлчилгээг сайжруулахад дэмжлэг үзүүлж буй Бельгийн ард түмэн, Засгийн газарт талархалаа илэрхийлсэн билээ. Цог Жавхлант Ван Филипп, Хатан Матильда нар ийнхүү хүндэтгэл үзүүлсэнд талархалаа илэрхийлээд, Монгол оронтой ойртон танилцах боломж гарна гэдэгт итгэлтэй байгаагаа дурдсан юм.
