МАХН-ын зохион байгуулалт, санхүү хариуцсан нарийн бичгийн дарга П.Цогтбаатарыг энэ оны 2 сарын 17-ны өдөр АТГ-аас саатуулан шалгаж байгаа талаар мэдээлэл цацагдаж, дуулиан тарьсан. Түүнийг Г.Шийлэгдамбын хэрэгт холбогдуулан АТГ-аас саатуулан Шүүхийн шийдвэр гүйцэтгэх ерөнхий газрын харьяа цагдан хорих 461 дүгээр ангид хорьж мөрдөн байцаалтын ажиллагаа явуулж байсан билээ. Харин түүнийг хэдхэн хоногийн өмнө "Хэрэгт хамтран оролцсон гэх үндэслэл тогтоогдоогүй" гэж Хяналтын прокурор үзэж, хэргийг хэрэгсэхгүй болгосон байна. Г.Шийлэгдамба болон П.Цогтбаатар нарыг Эрүүгийн хуулийн тусгай ангийн 268 дугаар зүйлийн 268.2-д зааснаар буруутгаж байсан бол дуулиан шуугиантайгаар баривчлан хорьж, олны дунд “хэрэгтэн” хэмээн цоллож нэр хүндийг нь гутаасны дараа ийнхүү хэргийг хэрэгсэхгүй болгов.
Ер нь сүүлийн жилүүдэд хууль хүчний байгууллага тэр дундаа АТГ-ын үйл ажиллагаа доголдож, бусдын нэр төрд халдаж, хэрэгтэн хэмээн “цоллосны” эцэст хэргийг хэрэгсэхгүй болгодог жишиг тогтсон гэх гомдол ихээр гарах болсон. Тэгвэл энэ удаагийн П.Цогтбаатарт холбогдох хэрэг ч үүнийг нотлох шиг болов.
Түүнчлэн хэрэгт холбогдуулан шалгуулж, олон сар жил хоригдож байсан хүмүүсийн хэрэг хэрэгсэхгүй болж, цагаатгаж байсан удаа олон. Тухайлбал “Хөтөлийн ЦШК”-ийн захирал асан А.Шоовдорын хэрэг хэмээн дуулиан тариад байсан эл хэрэг мөн л хэрэгсэхгүй болж байсан. Тодуулбал Авлигатай тэмцэх газраас 2014 оны наймдугаар сард “Хөтөлийн цемент, шохой” ХК-ийн гүйцэтгэх захирал А.Шоовдор болон тус компанийн Үйлдвэр эрхэлсэн захирал Б.Баатаржав, дэд захирал Д. Валяхүү нарыг албан тушаалаа урвуулан ашиглаж, улсад их хэмжээний хохирол учруулсан гэх үндэслэлээр шалгаж прокурор хянаж, яллах дүгнэлт үйлдсэн ч шүүх бүрэлдэхүүн А.Шоовдор нарын долоон хүний хэргийг цагаатгасан тогтоол гаргаж байсан.
Улс төрийн тоглоом хатуу гэдэг ч энэ мэтээр улс төрийн золиос болгож хэрэгтэн болгон зориг зүрхийг нь үхүүлдэг хачирхалтай тогтолцоо манай улсанд нэгэнт бий болжээ.
Мөн төсвөөс 808 сая төгрөг завшсан гэх хэрэгт буруутгагдаад байсан ХААИС-ын захирал Б.Бямбаа нар холбогдох хэргийг 2014 онд гэмт хэргийн бүрэлдэхүүнгүй байна гэж дүгнэн цагаатгаж байв. Энэ мэтчилэн бусдын нэр хүндийг гутаан хэрэгтэн мэт олон нийтийн дунд “зарласан”-ы дараа хэргийг хэрэгсэхгүй болгож, цагаатгадаг явдлыг таслан зогсоох цаг болсон байлтай.
Харин өдгөө хүргэн Г.Дэнзэн хэмээн цоллуулаад байгаа түүний хэрэг ч энэ бүгдийн араас орохыг үгүйсгэхгүй юм. ЗГХЭГ-ын дэд дарга асан Г.Дэнзэнг хэдхэн хоногийн өмнө Авлигатай тэмцэх газраас баривчилж, цагдан хорьсон.
Түүнийг ЗХЭГ-ын дэд даргаар ажиллаж байхдаа албан тушаалаа урвуулан ашиглаж “Эрдэнэс Таван толгой” компаниас тендер авч, эхнэрийнхээ “Говь повер” компани руу 17 тэрбум төгрөг шилжүүлсэн гэх үндэслэлээр өнгөрсөн 2015 онд эрүүгийн хэрэг үүсгэн шалгаж байсан. Уг хэрэгтэй холбогдуулан Г.Дэнзэнг гурван сар орчим цагдан хорьж байсан билээ. Харин энэ удаад шинэ хэрэг үүсгэн түүнийг дахин баривчилсан нь олны анхаарлыг татаж байна.
Г.Дэнзэнг анх Н.Алтанхуягийн Засгийн газрыг унагахын тулд хэрэгтэн болгож золиосолсон гэдгийг хэлэх хүн олон байсан. Харин дахин шинэ хэрэг үүсгэж, цагдан хорьсон нь мөн л Ерөнхий сайд асан Н.Алтанхуягын эсрэг явуулж буй ажиллагааны нэг хэлбэр байхыг үгүйсгэхгүй.
Улс төрийн тоглоом хатуу гэдэг ч энэ мэтээр улс төрийн золиос болгож хэрэгтэн болгон зориг зүрхийг нь үхүүлдэг хачирхалтай тогтолцоо манай улсанд нэгэнт бий болжээ.
“Нэр хугарахаас яс хугар” гэсэн ардын үг бий. Гэтэл ийнхүү хэрэгтэн хэмээн “цоллож”, олон сар жилээр хорин, бие сэтгэл, эрүүл мэндээр нь хохироосны эцэст хэргийг хэрэгсэхгүй болгож, цагаатгадаг шитгэх дарангуйлалыг таслан зогсоохыг ард түмэн хүсч байна.
Сэтгэгдэл (13)