Орон нутгийн сонгуулиар МАН зургаан дүүрэгт ялалт байгуулж, гурван дүүрэгт өвдөг шороодсон билээ. УИХ, НИТХ гээд бүхий л шатандаа ялалт байгуулж, иргэдийн итгэлийг хүлээсэн МАН ямар учраас Баянгол, Баянзүрх, Сүхбаатар дүүрэгт өвдөг шороодсон нь өдгөө олны анхаарлыг татах болов.

Баянзүрх дүүрэгт АН иргэдийн саналыг худалдаж авахын тулд мөнгө тараасан гэх асуудал өдгөө дуулиан тариад байгаа билээ. Ямартай ч тус дүүрэгт дээрх асуудлаас үүдэж МАН өвдөг шороодсон байхыг үгүйсгэхгүй.

Харин Баянгол дүүрэг цэнхэр тойрог гэгдэг бөгөөд үүнийг баталж, тус дүүрэгт АН ялалт байгуулсан. Баянголчууд УИХ-ын сонгуулиар ч АН итгэл хүлээлгэсэн билээ.

Тэгвэл Сүхбаатар дүүргийхэн УИХ-ын сонгуульд МАН-д итгэл хүлээлгэж, тус тойргоос нэр дэвшисэн эрхмүүд ялалт байгуулсан. Гэвч орон нутгийн сонгуулиар иргэд нүүр буруулсан уу гэдэг нь өнөөдөр асуултын тэмдэг болоод байгаа юм. Энэ асуудал хэд хэдэн шалтгаантай гэдгийг баттай эх сурвалж мэдээллээ.   

Сүхбаатар дүүргийн МАН-ын хороо сонгуульд амжилтгүй оролцсон нь УИХ-ын гишүүн, дүүргийн намын хорооны дарга Д.Цогтбаатартай шууд холбоотой аж. Ганцаарчилсан тоглолт хийх дуртай, амбицтай гэх шүүмжлэлд байнга өртдөг тэрбээр орон нутгийн сонгуульд ч энэхүү муу зангаасаа болж намаа ялагдалд хүргэсэн байна. Тодруулбал Д.Цогтбаатар орон нутгийн сонгуулийн үеэр нэр дэвшигчдээ сурталчилж, ялалт байгуулахын төлөө ажиллах бус хувийн тоглолт хийж, нэр дэвшигчдээ талцуулан хагаралдуулснаас үүдэж, улайрах ёстой Сүхбаатар дүүрэгт МАН унасан гэдгийг хэлэх хүн олон байгаа юм.

Түүнчлэн Д.Цогтбаатар орон нутгийн сонгуульд намаа ялагдалд хүргээд зогсохгүй өдгөө дүүргийн намын хороогоо дотор нь хагаралдуулж, “Шуудайд хийсэн үхрийн эвэр шиг” болгож эхэлжээ. МАН сонгуульд амжилтгүй оролцуулвал намын удирдлагад хариуцлага тооцдог бичигдээгүй хуультай. Гэсэн ч хуулиас дээгүүр том толгойтой тэрбээр нэр цэвэр үлдээхийн тулд жирийн гишүүд, дэмшигчдээ буруутган, улайран дайрах болсон гэдгийг ч баттай эх сурвалж мэдээлж байна.

Харин Д.Цогтбаатарын дээрх зохисгүй үйлдлийг намын жирийн гишүүд ихэд дургүйцэн хүлээн авч байгаа бөгөөд түүнд хариуцлага тооцож, намын даргаас огцруулах нь зүйтэй гэсэн байр суурьтай байгаа аж.

Ямартай ч эв нэгдэл, диктактуртай гэгдэг МАН-ын удирдлагууд энэ бүх асуудлыг анхааралдаа авч мянга, мянган гишүүд дэмшигчдийнхээ эрх ашгийг хүндэтгэн үзэх үү, эрх мэдэл, хөрөнгө мөнгөөр халхавчлах Д.Цогтбаатарын толгойг илж, байдлыг энэ чигээр хөврүүлэх үү гэдгийг цаг хугацаа харуулах буй за.  

24tsag.mn