Үдээс өмнөх УИХ-ын чуулганы үеэр "Авлигатай тэмцэх үндэсний хөтөлбөр" тогтоолын эцсийн хөтөлбөрийг хэлэлцэж гишүүдийн 64.7 хувь нь дэмжсэн.

Уг тогтоолыг хэлэлцэх үеэр УИХ-ын гишүүн М.Билигт АТГ-ын дарга Х.Энхжаргалаас асуулга асуулаа.

Тэрбээр "Х.Энхжаргалаас асуулт асууя. Төрийн албыг дээд доод шатанд хариуцлагатай болгомоор байна.  Авлигтай тэмцэх газрын  үүрэг функц  нь юу юм бэ. Үүнийг ард түмэнд тод болго. АТГ орон нутагт яаж ажилладаг юм бэ. Орон нутагт сүүлийн 20 жилд хамаатан саднаараа ИТХд нэр дэвшсэн бугшмал байдал үүслээ. Үүнд иргэд цөхөрсөн байдаг. Энэ асуудлыг орон нутагт хэрхэн  зохицуулж, АТГ яаж нөлөөлөх ёстой юм" гэв.

Түүний асуултад АТГ-ын дарга Х.Энхжаргал "АТГ хоёр чиглэлээр ажилладаг. Нэгдүгээрт авлига, гэмт хэргээс урьдчилан сэргийлэх, соён гэгээрүүлэх. Хоёрдугаарт  авлигын гэмт хэргийг илрүүлэх мөрдөн шалгах зарчмаар ажилладаг. Тиймээс биш цаасан дээр өдөржин гарын үсэг зураад байдаггүй. Бид төрийн алба хүндрэл учруулж байна уу гэдгийг харж хянаж байгаа. Ашиг сонирхолын зөрчлийг хянаж зөвлөмж өгдөг.  АТГ өдөрт 10 хүний л асуудлыг шийддэг. Орон нутагт АТГ-т хөл байдаггүй.  Төвөөсөө шалгадаг. Тиймээс Үндэсний хөтөлбөрт оролцох гол асуудал олон нийтийн зөвлөлийг байгуулж иргэдэд хяналтыг өгөх  ёстой. Одоогоор  21 аймагт 7 чиглэлд ажиллахаар төлөвлөж байна" хэмээн хариулсан юм.