УИХ дахь МАН-ын бүлгийн хурал өндөрлөлөө. Хуралдаанаар хэлэлцсэн асуудлын талаар тус бүлгийн ахлагч Д.Хаянхярваа мэдээлэл хийв. Энэ үеэр  эдийн засгийн хүндрэлийг даван туулах хөтөлбөрийг хэлэлцсэн байна.

Засгийн газраас виксель, концессийн гэрээгээр хийсэн ажлуудыг шалгаж цэгцлэх ажлын хэсэг байгуулагджээ. Энэ сардаа багтаад ажлын хэсэг шалгалт хийж, дүгнэлтээ гаргах үүргийг өгсөн аж.  Мөн ОУВС-гийн Стэнд бай хөтөлбөрт хамрагдах асуудлыг Ерөнхий сайдыг томилолтоос ирсний дараа тодорхой асуухаар боллоо хэмээсэн юм.

МАН-ын бүлгийн ахлагч Д.Хаянхярваа " Энэ удаагийнх амаргүй төсөв. Урсгал зардал нэмэгдсэн нь бүтцийн өөрчлөлттэй холбоотой. Яамдыг нэгтгэсэн, 3 төсөвтэй явж ирсний нэг болгосон. Энэ бүхнийг нэг төсөвтэй болгосноор зарим нэг сайдуудын багц нэмэгдсэн. Бид ирэх онд шинээр барилга барихгүй гэж шийдсэн. Бид олон улсын хөнгөлөлттэй зээл, гаднын банк гээд ярихаар “Bank of China”-г ярьдаг. Гэтэл олон хувилбар яригдаж байгаа. Бид ойрын үед хөрөнгө оруулалтын банкны тухай хуулийг өөрчилж, хөрөнгө оруулалт татах тухай судалж байгаа. Эдийн засгийг сайжруулахын тулд нэлээн хатуу сахилга дэг журамтай байж санхүүгийн хямралаас гарна" гэлээ.

Түүнчлэн ОУВС-гийн зүгээс 2008 онд тавьж байсан шаардлагуудаасаа нөхцөл нь хөнгөрсөн байна гэж гишүүд үзсэн байна.