Ерөнхий сайд асан Н.Алтанхуяг өнөөдөр 14:00 цагт Туушин зочид буудлын 5 давхар дахь Соёмбо танхимд мэдээлэл хийхээр тов зарлажээ.

Гэхдээ ямар асуудлаар мэдээлэл өгөх нь тодорхойгүй байгаа ч улстөрийн хэлмэгдүүлэлт, увайгүйтлийн талаар чангахан дуугарч магадгүй аж. Тэрбээр өнгөрсөн дөрөвдүгээр сарын 4-нд хийсэн мэдээлэл нь улс төрийн хүрээнд “бөмбөг дэлбэлсэн” түүхтэй.

АН дотор юу болоод байгааг тэрээр товч бөгөөд тодорхой хэлчихсэн нь олон хүнд цочроо өгсөн гэхэд болно. Тодруулбал Монголын улс төр өнөөдөр ямар арга замаар явж байгааг “...Эх орноо гэх сэтгэлгүй, ханаж цаддаггүй шуналтай хүмүүс төрийн эрх мэдлийг хувийнхаа явцуу зорилгодоо увайгүй ашиглаж, монгол хүн монголдоо сайхан амьдрах хүслийг нухчин дардаг. Тэд төрөө хутган үймүүлж, баялаг бүтээгчдээ айдас хүидэст автуулж, хуулийн нэрээр далайлган, айлгаж, мөнгө, бизнес, лицензийг нь ил тод дээрэмдэж байна...” гэсэн юм.

Ийм хэлмэгдүүлэлт, засаг хуулийн нэр барьсан дээрэм болдог юм байна гэдгийг биеэрээ мэдэрч, амссан учраас Н.Алтанхуяг өнөөдөр ингэж дуугарч байна гэж харах олон ч байсан. Ийм учраас Ерөнхий сайд асан Н.Алтанхуягийн энэ удаагийн мэдээлэл ямар асуудлаар “Бөмбөг дэлбэлэх” бол гэдэг нь олны анхаарлыг татаж байна.

Б.Цэцэг