УИХ-ын гишүүн С.Жавхлан үдээс хойшхи  Их хуралд оролцож Нийтээр тэмдэглэх баярын тухай хуульд нэмэлт өөрчлөлт оруулах тухай хуулийн хэлэлцүүлгийг хийх шатанд дэмжихгүй гэдгээ илэрхийллээ.

Тэрбээр "Нийтээр тэмдэглэх баярыг өөрчлөлт тодруулах тухай хуулийн төслийг дэмжихгүй. Арван нэгдүгээр сарын 26-н бол  хоёр намын баяр.

Түмэн олон яаж амрах завгүйгээр ажиллая гэж бодож явахад дахиад баярлана  гэж байна.  Энэ бол тархины тураал. Нөгөө л хөшөөндөө цэцэг өргөсөн байдаг л юмаа хийнэ байх.

Энэ бол дэндүү бухимдал төрүүлнэ.  Үнэхээр тэмдэглэмээр байгаа  бол бахархах зүйлийг оруулмаар байна. Миний хувьд их гунигтай байна. Ходоод нь цатгалан тархи нь турсан хүмүүс.

Мөн би дээр нээлттэй хэлэлцүүлэг зохион байгуулна гэдгээ зарласан. Хэлэлцүүлэгт миний урьсан эрхмүүд ирэхгүй бол үнэхээр энэ хүмүүс гэмтэй юм байна гэдгийг би зарлана. Гэмт хүн л гэлбэлзэж явдаг шүү дээ.

Би Ерөнхий сайд асан Бямбасүрэн, Ерөнхийлөгч асан Н.Энхбаяр гуайг урьсан байгаа. Миний зохион байгуулах хэлэлцүүлэгт түмэн олонтойгоо үнэнээ хуваалцъя гэсэн хүмүүс нээлттэй ирээрэй гэдгийг хэлмээр байна.

Түүнчлэн ардчилал, улс орон яагаад өнөөдөр хөгжихгүй байна вэ. Хөшөөгөө нэг хараарай. Тойруулаад гинжилсэн байгаа биз" гэлээ. Түүний энэ үгийг шинжлэх ухааны үндэслэлгүй, сэдвээсээ хальсан гэж зарим гишүүд шүүмжилсэн.