МАН-ын VII бага хурлаар Ерөнхий нарийн бичгийн даргыг сонгох асуудлыг хэлэлцэх юм.

Мөн хуралд оролцож буй бага хурлын гишүүдийг чөлөөлж, томилох асуудал шийдэгднэ.

Үүнтэй холбогдуулан Ерөнхий нарийн бичгийн даргын үүрэг гүйцэтгэгч Д.Амарбаясгалан мэдээлэл хийлээ.

Хурлаар МАН авлигаас ангид байх чиглэлд хэрхэн ажиллах талаар болон улс төрийн албан тушаалтнууддаа хариуцлагын гэрээ байгуулж ажиллах тухай хэлэлцэх болно гэдгийг Д.Амарбаясгалан дурдав. Мөн рөнхий нарийн бичгийн даргыг сонгох, орон тооны бус нарийн бичгийн даргыг томилох асуудлыг хэлэлцэх аж.

Тэрбээр " 2016 оны УИХ-ын сонгууль болсноос хойш миний бие МАН-ын Ерөнхий нарийн бичгийн даргын үүргийг гүйцэтгэж байна. МАН-ын нарийн бичгийн даргын үүргийг Удирдах зөвлөлийн гишүүн Н.Төмөрхүү гүйцэтгэж байгаа.  Үүрэг гүйцэтгэж байгаа хүмүүсээ жинхлэх үү, өөр хүмүүсийн нэрийг дэвшүүлэх үү гэдэг нь Бага хурлын гишүүдийн мэдэлд байгаа.

Манай бага хурал 310 гишүүнтэй. Үүнээс 33 гишүүн бага хурлаасаа гарч, шинээр томилогдоно. 33 бага хурлын гишүүдийн 25 нь төрийн захиргааны албанд шилжсэн. Аймаг нийслэлийн ИТХ-ын дарга, Засаг дарга нар бага хуралд квотоор орж ирдэг" хэмээлээ. Түүнчлэн

-Та Ерөнхий нарийн бичгийн даргаар сонгогдвол ямар бодлого барьж ажиллах вэ? гэсэн сэтгүүлчийн асуултад тэрбээр

-Ерөнхий нарийн бичгийн даргаар томилогдвол цаашдаа МАН-ын байгууллагын өрсөлдөх чадвар, боловсрол,  бодлогын судалгаан дээр суурилсан улс төрийн үйл ажиллагаагаа явуулна. Улс төрийн намуудын бодлогын судалгаан дээр суурилж улс орныхоо нийгэм, эдийн засгийн байдалд үнэлэлт дүгнэлт өгсөн бодитой бие даасан мөрийн хөтөлбөрийг дэвшүүлсэн өрсөлдөх чадвартай хүчин байх ёстой гэж үздэг. Энэ чиглэлд ажиллаж 21 аймаг, 330 суманд  байгаа намын байгууллагын үйл ажиллагааг идэвхжүүлэх чиглэлд ажиллана. Учир нь аймаг нийслэл сумдын төвшинд ялалт байгуулсан намын үйл ажиллагаа сулрах чиг хандлага байдаг. Үүнийг өөрчилж, хүчтэй улс төрийн хүчин байх чиглэлд гол анхаарлаа хандуулна гэсэн юм.