УИХ-ын чуулганы нэгдсэн хуралдаанаар Хөгжлийн банкны талаар авах арга хэмжээний тухай тогтоолын төслийг хэлэлцэж эхлэх үед АН-ын бүлэг тав хоногийн завсарлага авах санал гаргалаа.

Харин он дуусахаас өмнө дээрх тогтоолын төслийг баталж Хөгжлийн банкийг хүндрэлээс гаргах шаардлагатай байгаа учраас олонхийн бүлгийн гишүүд завсарлага өгөхийг эсэргүүцсэн юм. Тэгвэл АН бүлгийн саналыг нь УИХ-ын дэд дарга Ц.Нямдорж хүлээн авч тав хоногийн завсарлага өгөв. Тэрбээр “Хөгжлийн банкинд хийсэн шалгалтын асуудлыг Засгийн газраас нэн яаралтай горимоор хэлэлцүүлэхээр оруулж ирсэн тал хуудас тогтоолтой нь хольж хутгаад хэрүүл хийгээд байх юм.

Хооронд нь холбож ярих хэрэггүй. Энэ тогтоолыг баталж Хөгжлийн банкийг сэхээнээс гаргах шаардлагатай байна. Гэхдээ АН-ын бүлэгт хүссэн тав хоногийн завсарлагыг нь өгье. Та бүхэн маргааш хэлэлцээд аль болохоор засварлагынхаа хугацааг наашлуулаарай. Эрх баригчид цөөнх байж үзээгүй биш. Завсарлага өгөхийг эсэргүүцэх хэрэггүй. Харин олонхийн бүлэгт нэг арга байна. Юу гэхээр хуульд өөрчлөлт оруулж завсарлага авдаг байдлыг болиулах” гэсэн юм. Улмаар өнөөдрийн чуулганы нэгдсэн хуралдаан өндөрлөлөө.