МАН-ын бүлэг өнөөдөр хуралдаж, хуралдсан асуудлын хүрээнд яригдсан Хөгжлийн банкны хуулийн шинэчилсэн найруулгын хуулийн төсөл болон шалгалтын дүнтэй холбогдсон асуудал, Тавантолгойн төсөлтэй холбоотой асуудлаар мэдээлэл хийв.

УИХ дахь МАН-ын бүлгийн дарга Хаянхярваа “Бид өнөөдөр Тавантолгойн төсөлтэй холбоотой хэвлэл мэдээллийн хэрэгслээр гараад буй асуудлаар засгийн газрын гишүүдээс мэдээлэл авлаа.

Мөн Хөгжлийн банкны шалгалттай холбоотой асуудлаар бид нэлээд санал бодлоо солилцлоо. Хөгжлийн банкны шалгалтын 200 гаруй хуудас шалгалтын материал тавдахь өдрийн чуулганы хуралдаан тарах үед Засгийн газар манай бүлэгт нууцын зэрэглэлтэйгээр ирүүлсэн. Бид энэхүү материалтай танилцаж үзээд нууцын зэрэглэлтэй материалыг шууд аваад чуулганы танхим дээрээс цацаж байгааг хууль зөрчиж байна гэж үзэж байна.

Өөрөөр хэлбэл өнөөдрийн Хөгжлийн банкны шалгалттай холбоотой материал нууцын зэрэглэлээс гаргахын тулд тусгай процетуртай байдаг. Тиймээс бүлэг дээр нэгэнт энэхүү шалгалтын дүнг олон нийтэд нээлттэй цацаж байгаа учраас бид энэхүү асуудлыг нууцын зэрэглэлээс нь гаргах шаардлагыг тавьж байна” гэсэн юм. Түүнчлэн Хөгжлийн банкаар дамжин гарч байгаа төсөл хөтөлбөр хуулийн хүрээнд хийгдсэн эсэхийг шалгах ажлыг хэсгийг Энхбаяр гишүүнээр ахлуулан байгуулсан гэдгийг тэрбээр мөн дуулгасан. Энэ талаар тэрбээр “Үнэхээр Хөгжлийн банкны төсөл хөтөлбөрүүд өнөөдрийн мөрдөж байгаа хуулийнхаа хүрээнд хийгдсэн байна уу, энэ төсөл хөтөлбөр Ардчилсан намыханы хэлээд байгаа шиг МАН-ын нэртэй олон компаниуд аваад замхарчихаад байгаа юм уу гэдгийг олон түмэнд ил тодоор гаргаж тавъя гэдэг дээр санал нэгдсэж Ажлын хэсэг байгуулсан" хэмээв.

Мөн тэрбээр "Ардчилсан намынхан томоохон төсөл хөтөлбөрийг МАН-ын авсан гэдэг асуудал ярьдаг. Гэтэл сонгуулийн өмнө Ч.Сайханбилэг сайд МАК-ын төсөл, Монполиметийн цементийн үйлдвэр дээр очоод тууз хайчлаад “Хөгжлийн банкнаас олгосон хамгийн үр ашигтай төслүүдийн нэг нь энэ боллоо” хэмээн мэдэгдэж байсан. Тэгвэл өнөөдөр энэхүү мэдээлэл үнэн байж үү, худал байж үү гэдгийг хуулийн хүрээнд олон нийтэд ил гаргаж ирэх ёстой гэсэн байр суурьтай байна" гэлээ.

МАН-ын бүлэг мөн өнөөдөр Засгийн газраас Тавантолгойтой асуудлаар хэвлэл мэдээллийн хэрэгслээр гараад байгаа шиг Тавантолгойн 49 хувийг 400 сая амдоллараар зарах гээд байгаа юм уу, энд Засгийн газар ямар байр суурьтай байгаа, энэ төсөл хөтөлбөр бэлэн болчихсон үзэглэх гээд байгаа юм уу  гэдэг асуудлыг асууж тодруулсан байна. 

Энэ талаар Ерөнхий сайд, Уул уурхайн сайдын зүгээс Тавантолгойн төсөл өнөөдөр зөвхөн эхлэлийн шатандаа л явж байгааг дуулгажээ. Мөн Засгийн газрын зүгээс "Гадна дотны компаниуддаа зөвхөн саналаа л өгчихсөн, өөрсдийн санал, нөхцлөө хэлж, илэрхийлж байна. Түүнээс биш өнөөдрийн хэвлэлд гараад байгаа шиг 49 хувийг 400 сая доллараар зарах гээд байгаа зүйл огт байхгүй, эцсийн байдаар 66 хувь нь ММС,  34 хувь нь Засгийн газар, 49 хувь нь Шинхуай байна гээд тохиролцоод гэрээ хэлэлцээр хийж гарын үсэг зурсан зүйл байхгүй. Мөн 49/51 гэдэг бол зөвхөн Засгийн газрын түвшинд яригдаж байгаа нэг л хувилбар. Бид аль болох маш олон хувилбарыг сонгож байгаа хамгийн үр ашигтай гэж үзсэн хувилбарыг сонгож Тавантолгойн төсөлд оролцох компаниудтай уулзаж гэрээ хэлэлцэл хийхээ шийдэж, УИХ-д өргөн бариад хэлэлцүүлнэ" гэдгийг хэлжээ.  

Тавантолгой Оюутолгойн замаар ороод алга болчих юм байна гэдэг хардлагууд байгаа бол тийм биш юм. Учир нь Засгийн газраас бүх ажлыг хуулийн дагуу явуулна гэж хэлж байгаа. Монголд хамгийн үр ашигтай байх хувилбарыг сонгоод УИХ-д өргөн барьж хэлэлцүүлнэ гэж Засгийн газраас мэдэгдсэн. Түүнээс биш өөр хувилбар гаргаад бие даан шийдвэр гаргах хууль эрх зүйн орчин байхгүй. Бид ч тийм зарчмаар явуулахгүй. Мөн Хөгжлийн банкны хуулийн шинэчилсэн найруулгыг Б.Жавхлан тэргүүтэй нэр бүхий гишүүд санаачилсан байна. Энэ талаар УИХ-ын гишүүн  хууль санаачлагч Б.Жавхлан мэдээлэл өглөө.

Тэрбээр "Хөгжлийн банктай холбоотой гурван асуудал яригдаж байгаа. Өнгөрсөн намар Хөгжлийн банкинд хийгдсэн шалгалтын асуудлыг байнгын хороогоор хэлэлцэж байгаа. Мөн Хөгжлийн банкнаас Засгийн газраар дамжуулан өргөн барьсан тогтоол бий. Тус тогтоолд Хөгжлийн банкны тэнцэлд байгаа Засгийн газартай шууд холбоотой өр авлагыг Засгийн газар руу шилжүүлэх, дүрмийн санг нэмэгдүүлэх  талаар тусгасан байгаа. Харин өнөөдөр бүлгийн хурлаар Хөгжлийн банкны тухай хуульд оруулах шинэчилсэн найруулгыг хэлэлцсэн. Энэ дарааллаар УИХ-аар хэлэлцэгдэж байгаа. Хөгжлийн банкны тухай хуульд оруулах шинэчилсэн найруулга нь

1. Төсөл санхүүжүүлэх шийдвэр гаргахтай холбоотой зохицуулалтыг шинэчилсэн.

2. Хараат бус бие даасан байдал, ашигтай ажиллах зарчмыг хэрэгжүүлэх механизмыг бий болгосон.

3 Үйл ажиллагааны хүрээг өргөжүүлсэн

4. компанийн засаглалын тогтолцоог сайжруулсан

5. Хяналтын тогтолцооны эрх зүйн орчныг бий болгосон байна. Одоо хүчин төгөлдөр байгаа хууль нь алдаа, оноотой хуулийн цоорхойтой зүйлүүд байгаа. Хуулийг санаатайгаар зөрчсөн үйлдлүүд ч шалгалтаар илэрч байгаа. Тэгэхээр хуулийг илүү сайжруулах, зохицуулагдаж амжаагүй үлдсэн цоорхойг сайн зассан. Цаг хугацааны хувьд хоёр он дамжаад УИХ-аар хууль маань хэлэлцэгдээд явах байх" гэлээ.

Б.Энхжин