УИХ-ын Хууль зүйн байнгын хорооны хуралдаан үргэлжилж байна. Хуралдаанаар Эрүүгийн хуулийн шинэчилсэн найруулгын төслийг хэлэлцэх эсэхийг шийдлээ.

Байнгын хорооны хуралдааны үеэр хэлэлцэж байгаа асуудалтай холбогдуулан УИХ-ын гишүүн О.Баасанхүү уг хуулийн төсөлд танхайн хэргийг тусгайлан авч үзэхийг сануулаад өмнөх хуульд танхайн хэргийг зөрчил мэтээр үзэж, зохицуулж байсан гэдгийг онцолсон. Мөн аргагүй хамгаалалтын асуудлыг нарийвчилж авч үзэх хэрэгтэйг тэрээр онцоллоо.

Гишүүд энэ мэтчилэн байр суурь илэрхийлсний дараа санал хурааж тус хуулийх төслийг хэлэлцэх нь зүйтэй гэж үзлээ. Мөн тус хуулийг судлах ажлын хэсгийг байгуулах шийдвэр гаргасан бөгөөд ажлын хэсгийн ахлагчаар УИХ-ын гишүүн Х.Нямбаатар ажиллахаар боллоо. Одоо харин Зөрчлийн тухай хуулийн шинэчилсэн найруулгын төслийг хэлэлцэж байна.