МАН-ын Удирдах зөвлөл өчигдөр хуралдах байсан ч түр хугацаагаар хойшлуулж, өнөөдөр хуралдаж байгаа юм.  Хуралдаанаар ирэх дөрвөн жил МАН ямар бүтэцтэй явах, хэдэн нарийн бичиг, хэдэн хэлтэстэй ажиллах  вэ гэдэг дотоод бүтцийн асуудлаа ярилцаж байгаагаас гадна сайдын томилгооны асуудлыг ярьж байгаа аж. Тодруулбал, Уул уурхай, хүнд үйлдвэрийн дэд сайд Х.Бадамсүрэн "Эрдэнэт үйлдвэр" ХХК-ийн Ерөнхий захирлаар томилогдон сайдын суудал сул байгаа. Үүнд МАН-ын гурван гишүүн өрсөлдөж өдгөө МАН-ын даргын зөвлөх Д.Загджав ялалт байгуулах магадлал өндөртэй болоод байгааг эх сурвалж мэдээллээ.

Гэхдээ УИХ-ын гишүүд Д.Загджавыг дэд сайдад, Н.Төмөрхүүг сайдаар томилох тухай асуудлыг оруулсан боловч Н.Төмөрхүүг нөлөө багатай, тиймээс тохиромжгүй гэж үзсэн бололтой. Ямартай ч Д.Загджавыг дэмжих хандлага түлхүү гарч байгаа гэнэ. Сайдаар гэхийн учир нь Уул уурхай, хүнд үйлдвэрийн сайд Ц.Дашдорж эрүүл мэндийн шалтгаанаар ажлаа өгөх тухай асуудал яригдаж байгаа юм. Гэхдээ энэ нь эрүүл мэндийн асуудал биш нам доторх "зодоонтой" холбоотой гэх нь ч бий.

Дээрх хоёр гишүүнээс гадна Ховд аймгийн МАН-ын дэд дарга Б.Очбадрах гэгч залууг Хууль зүй, дотоод хэргийн сайд С.Бямбацогт зүтгүүлэхээр санал оруулсан байна. Харин түүний хувьд сайдын ч, дэд сайдын суудал ч хүнддэх агаад зөвхөн рейтинг өсгөх, олны анхаарлыг татах тоглолт хийж хувь тоглолт хийж байгаа хэмээх "бор шувуу" байгаа юм. Ийн хэлэхийн учир нь С.Бямбацогт Д.Загджав нар нэг нутгийнх. Тийм ч учраас С.Бямбацогт Д.Загджавыг дэмжин гарын үсэг зурсан аж. Харин Б.Очбадрах бол МАН-ын гишүүдэд илүү танигдаж, улс төрийн хүрээнд лав шургах гэсэн л хүн. Саяхан өөрийнх нь суудал дэнжигнэж байсан Хууль зүй, дотоод хэргийн сайд С.Бямбацогт одоохондоо намын даргынхаа хүнтэй албан тушаалын суудал булаацалдах "зүрхгүй" байгаа хэмээж байгаа юм.

Энэ талаар бид эргэн дэлгэрэнгүй мэдээлнэ.