Яг одоо: УИХ-ын нэгдсэн чуулганаар  “Монгол Улсын Ерөнхийлөгчийн 2017 оны ээлжит сонгуульд техник хэрэгсэл хэрэглэх тухай” Улсын Их Хурлын тогтоолын төслийг хэлэлцэж байна.

Энэ үеэр УИХ-ын гишүүн Ц.Даваасүрэн "Ерөнхийлөгчийн сонгуулийн санал тоолох автоматжуулсан системийн аюулгүй байдлын талаар тодорхой мэдээлэл өгөөч. АНУ-д хакердчихлаа гээд байгаа. Энэ хакердуулах ажиллагаанд өртөх эрсдэл байна уу" хэмээн асуулаа.

Гишүүний энэ асуултанд СЕХ-ны дарга Ч.Содномцэрэн хариулж "Сонгуулийн автоматжуулсан системийн аюулгүй ажиллагааны талаар тодорхой заалтууд байдаг. Үндсэндээ ажлын хэсэг байгуулагдана. Энэ ажлын хэсэг сонгууль бүрээр байгуулагддаг. Энэ ажлын хэсэг саналын хуудсыг Тагнуулын хамгаалалттай складанд орох хүртэл нь хяналт тавьдаг ажлын хэсэг. Миний хувьд аюулгүй байдал маш сайн хангагдсан гэж үзэж байгаа. АНУ-д яриад байгаа зүйл манайд байхгүй. Тог байхгүй, сүлжээ байхгүй газарт ч санал авч болдог. Модемоо залгаад л дамжуулчихна. Мөн дүнг нь ажиглагчийн гар дээр байгаа биллтэй тулгаж үздэг. Бүх биллийг авч төв сервер дээр байгаа дүнтэй тулгаж үзээд албан ёсны дүнгээ зарладаг. Тиймээс манай автоматжуулсан систем найдвартай. Сонгуулийн дүнг хакердах боломжгүй" гэлээ.