Улсын Их Хурлын Аюулгүй байдал, гадаад бодлогын байнгын хороо өчигдөр зарим Элчин сайдын яам, Ерөнхий консулын газар, Консулын газрыг татан буулгах тухай Улсын Их Хурлын тогтоолын төслиийн талаар хаалттай хуралдлаа.

Гадаад харилцааны яамны 2016 оны тайлан болон Засгийн газраас өнгөрсөн оны 12 дугаар сарын 22-ны өдөр өргөн мэдүүлсэн Монгол Улсын зарим Элчин сайдын яам, Ерөнхий консулын газар, Консулын газрыг татан буулгах тухай тогтоолын төслийн үзэл баримтлалыг хэлэлцэх эсэх асуудлыг хаалттай горимоор хэлэлцсэн юм.

Монгол Улсын зарим Элчин сайдын яам, Ерөнхий консулын газар, Консулын газрыг татан буулгах тухай Улсын Их Хурлын тогтоолын төслиийн тухай танилцуулгыг бүрэн эхээр нь хүргэе

Монгол Улсын Их Хурлаас 2011 онд Япон Улсын Осака хотод Ерөнхий консулын газар, 2013 онд  Бүгд Найрамдах Индонези Улс, Холбооны Бүгд Найрамдах Бразил Улсад Элчин сайдын яам, Бүгд Найрамдах Хятад Ард Улсын Хайлаар хотод Консулын газар тус тус нээн ажиллуулахаар шийдвэрлэсэн.

Индонези Улс, Бразил Улс манай улсад Элчин сайдын яамдаа нээгээгүй, БНХАУ-д суугаа Элчин сайдууд нь манай улсыг хавсран суудаг. Харин Япон Улсын хувьд манай улсад Элчин сайдын яам, БНХАУ мөн Элчин сайдын яам, түүнчлэн Зам-Үүдэд Ерөнхий консулын газартай.

Индонези, Бразил улсуудтай явуулж байгаа хоёр талын харилцаа, хамтын ажиллагаа төдийлөн идэвхжихгүй байна. Ялангуяа гадаад худалдаа, эдийн засгийн харилцаа доогуур түвшинд байгаа болно. Мөн тус улсуудад байнга оршин суугаа Монгол Улсын иргэн бусад улстай харьцуулахад цөөн байна. 

Япон Улсад Монгол Улсын Элчин сайдын яам болон Ерөнхий консулын газар, харин Бүгд Найрамдах Хятад Ард Улсад Монгол Улсын нийт 4 дипломат төлөөлөгчийн газар ажиллаж байна.

Эдгээр Дипломат төлөөлөгчийн газрын үйл ажиллагааны орлого, зардал болон татан буулгаснаар үүсэх зардал, хэмнэлтийг харьцуулбал:

Индонези Улсыг Тайландын Вант Улсад суугаа ЭСЯ, Бразил Улсыг Америкийн Нэгдсэн Улсад суугаа ЭСЯ тус тус хариуцаж ажиллана. Харин Япон Улсын Осака хотод суугаа Ерөнхий консулын газрыг чиг үүргийг Япон Улсад суугаа ЭСЯ, БНХАУ-ын Хайлаар хотод суугаа Консулын газрын чиг үүргийг тус улс дахь бусад дипломат төлөөлөгчийн газар хариуцан гүйцэтгэнэ.

Иймд олон улсын эрх зүйн харилцан адил байх зарчмыг баримтлан улс төр, эдийн засаг, соёл, хүмүүнлэгийн харилцаа идэвхигүй, маш цөөн тооны иргэд оршин суудаг Индонези, Бразил улсуудад суугаа ЭСЯ болон өөр дипломат төлөөлөгчийн газар ажиллаж байгаа Япон Улсын Осака хотод суугаа Монгол Улсын Ерөнхий консулын газар, БНХАУ-ын Хайлаар хотод суугаа Консулын газрыг тус тус татан буулгаж, улсын төсвийн хүндрэлтэй нөхцөл байдалд тодорхой хэмнэлт хийх, төсвийн урсгал зардлыг бууруулах боломжтой гэж тооцож холбогдох шийдвэрийн төслийг боловсруулсан болно.  Уг асуудлыг Засгийн газрын 2016 оны 12 дугаар сарын 14-ний өдрийн хуралдаанаар хэлэлцэн шийдвэрлэсний дагуу Улсын Их Хурлын тогтоолын төслийг өргөн мэдүүлсэн юм.