Хууль зүйн байнгын хорооны өнөөдрийн хуралдаанаар Эрдэнэтийн 49 хувийг төрд авх эсэх асуудлыг хэлэлцэж, олонхийн саналаар дэмжлээ. 

Хуралдааны үеэр УИХ-ын гишүүн Д.Тэрбишдагва “Их эмгэнэлтэй юм болж байна. Бид 49 хувийг эзэмшигчдийн үгийг сонсох ёстой. Энэ хүмүүсийн буруугаар биш Үндсэн хуулийн зарчмаа зөрчсөн хүмүүсийн гай шүү дээ. Ч.Сайханбилэг Дубайд очиж гэрээ хийчихээд, юу ч хийсэн болох юм байна гэж бодсон байх. Монголыг баллаад байгаа хүмүүст хариуцлага тооцох тогтолцоо байхгүй байна. Тийм учраас энийг хэлэлцэх ёстой. Гэхдээ хувийн хэвшлээ ингэж шууд буруутгаж болохгүй.

УИХ-ын гишүүн Ж.Энхбаяр "ОУВС-тай хэлэлцээ хийж байгаа ийм чухал үед хувийн хэвшлийн өмчийг авах асуудлыг яриад сууж байгаа нь зохимжгүй. Төр өмч хувьчлалыг хумиснаар цаашаа хол явахгүй. Нам дагасан хүмүүсийн бизнес л болдог. Монголын ард түмэн хувьцаа хэлбэрээр баялагийн хуваарилалтыг хийх ёстой. Төрд зуун хувь шилжлээ гээд “Эрдэнэт” үйлдвэр сайжрахгүй. Нийтдээ 26 жилийн хугацаанд гарсан төрийн өмчийн баялагийг ард түмэн хувьцаа хэлбэрээр эзэмших хэрэгтэй. Хувийн компаниуд ч тэр, хэт монополи байдал үүсгэж болохгүй. Ер нь 49 хувийг төр авлаа гээд сайн үр дагавар гарахгүй" гэв.

УИХ-ын гишүүн З.Нарантуяа “Ажлын хэсгийн дүгнэлт дээр энэ мөнгө тийм байх магадлалтай, шилжүүлсэн байх талтай гэхчлэн бичсэн байна. Ц.Нямдож, О.Баасанхүү нар хуульч мэргэжилтэй хүмүүс. Шүүх хурал дээр магадлалтай, талтай гэсэн дүгнэлтэд үндэслэн шийдвэр гаргадаггүй. Эдгээр зөрчлүүдийг хууль хяналтын байгууллагууд тогтоосон юм уу. Монгол Улсын парламент хувийн хэвшлийнхээ үгийг ч сонсохгүй, ингэж дайрч болохгүй. Монголбанкнаас баахан мөнгө аваад “Эрдэнэт”-ийн 49 хувийг авчихсан гэх юм. Баримт нь байна уу. “Эрдэнэт”-ийн 49 хувийг авснаар засгийн газарт хэдий хугацааны дараа ашгаа өгч эхлэх бэ? гэх асуултыг ажлын хэсгээс тодруулсан. Харин энэхүү асуултад Ц.Нямдорж гишүүн “Би ажлын хэсгийн ахлагч биш. Засгийн газрын тогтоолд Ч.Сайханбилэг, Д.Эрдэнэбат нар гарын үсэг зурсан байсан. Хуулийн талаасаа УИХ ямар ч асуудал үүсгээгүй. З.Нарантуяа чи зарим асуултаа наад Д.Эрдэнэбатаасаа асуу” хэмээв.

Харин Хууль зүй, дотоод хэргийн дэд сайд Б.Энхбаяр “Засгийн газар уг асуудлыг 2016.10.17-ны өдөр АТГ-д шалгуулахаад өгсөн. Хариу нь 2016.12.20-д Нийслэлийн прокурорын газраас гэмт хэргийн бүрэлдэхүүнгүй гэсэн хариулт ирүүлсэн” гэх хариулт өглөө.

УИХ-ын гишүүн Б.Пүрэвдорж ““Эрдэнэт” үйлдвэрийн 49 хувийг ярихаар төрийн өмчийн 51 хувийн асуудалд давхар яригддаг. Жастын Ш.Батхүү “Эрдэнэт” үйлдвэрийн 51 хувийг “Стандарт” банкны барьцаанд тавьж, зээлийн төлөлтийг зарцаасан. Одоо засгийн газар 75-100 сая ам.доллар төлөх нөхцөлд байна. Ирэх сард Арбитраар дахиад энэ асуудал хэлэлцэгдэнэ. Ер нь Монголын төрд 51 хувь байгаа юу. Төрийн ийм байдлаар засгийн газарт асуудал үүсгэж байна” гэхэд Төрийн өмчийн бодлого зохицуулалтын газрын дарга Ц.Ням-Осор “Маргаантай зүйл байгаа. Жастынхан өөрсдийгөө өмөөрөөд байдаг ч тодорхой мөнгөн эх төлбөрүүдийг бас төлсөн байдаг. Энэ асуудал дээр хуулийн фирм ажиллаж, хэд хэдэн хүндрэлүүдийг гэтлэх аргыг судлаж байна. Гол нь, төрийн байгууллагаас ийм мэдээлэл өгч, нарийн тоог өгчихөөр нөгөө талд засгийн газрын байр суурь болж ойлгогддог. Шүүх дээр үүнээс болж асуудал мушгигддаг учраас нарийн тоог хэлэх боломжгүй байна” гэж хариулав.

Энэ талаар Санхүүгийн зохицуулах хорооны дарга Ц.Ням-Осор "Энэ асуудлыг олон нийтийн өмнө шууд дэлгэн хэлэх боломжгүй. Дараа нь холбогдох албаны хүмүүст нь мэдээлэл өгье" гэсэн бол “Монгол зэс” корпорацийн ТУЗ-ын дарга М.Мөнхбаатар ““Эрдэнэт” үйлдвэрийн уг асуудлаар шүүхийн маргаан үүсгэж, холбогдох бэлтгэлээ хийж байна. Бодит нөхцөл байдал дээр олон улсын шүүх дээр “Эрдэнэт” үйлдвэр ялагдсан байдалтай байгаа” гэсэн нэмэлт мэдээлэл өгсөн юм.