Нийслэлийн Засаг дарга бөгөөд Улаанбаатар хотын захирагч С.Батболд захирамж гаргаж, Баянзүрх дүүргийн Засаг даргаар Э.Бат-Амгаланг батламжилсан нь нэлээд үймээн самуун тариад байгаа билээ. Тэгвэл Ардчилсан нам, Нийслэлийн ардчилсан намаас Баянзүрх дүүрэгт үүсээд байгаа нөхцөл байдалтай холбогдуулан мэдээлэл хийлээ.

Мэдээллийн үеэр АН-ын нарийн бичгийн дарга О.Магнай “Өнгөрсөн өдрүүдэд МАН-ынхан дэндүү их өрөөсгөл тайлбар хийлээ. Дээр нь хууль бус зүйлийг таслан зогсоох ёстой цагдаагийн байгууллага эрх баригчдын гар хөл боллоо. Тиймээс Ардчилсан нам ЦЕГ болон Улсын Ерөнхий прокурорт энэ талаараа тайлбар хийх шаардлагыг  хүргүүлээд байна. Учир нь энэ бол нэг дүүргийн асуудал мэт боловч улс даяар үүсээд байгаа асуудал юм. Ардчилсан ёсонд бүдүүлгээр халдаж байгаа энэ үйлдлийг Ардчилсан нам хэрхэвч хүлээн зөвшөөрөхгүй.

Мөн шүүхээр хориглоод байхад Дүнжингарав уралдааныг зохион байгууллаа. Хууль дүрмийг удандаа гишгэлээ. АН уламжлалыг дээдэлдэг. Гэхдээ уламжлалаар түрүү барьж хэдхэн хүний эрх ашгийн төлөө хүүхдийн эрүүл мэндээр тоглож байгаа асуудлыг хэрхэвч зүгээр өнгөрч болохгүй . Энэ уралдаантай холбоотой ямар нэгэн асуудал гарвал Морин спорт уяачдын холбооны тэргүүн, УИХ-ын дарга М.Энхболдод хариуцлага хүлээлгэх хэрэгтэй гэдгийг онцолж хэлмээр байна” гэсэн бол Нийслэлийн АН-ын дарга  Э.Бат-Үүл  “Засгийн эрх мэдлийг хүч түрэн булааж авч байна.

Засаг даргыг хүчээр томилж байна. Үндсэн хуульд засгийн бүх эрх мэдэл ард түмний мэдэлд байна заасан. Хууль бусаар булаахыг  нь хориглосон. Үүнийг эрүүгийн гэмт хэрэг үздэг. Гэвч шүүх эрх мэдэлтэй нь хамт булааж байна. Шүүхийн засаглал, хараат бус байдалд нөлөөлж байна.  Түүгээр ч барахгүй хууль бус зүйлийг таслан зогсоох цагдаагийн байгууллага нь үүнд дэмжлэг үзүүлж байна. УИХ-ын дэд дарга Ц.Нямдорж намынхандаа хандаж засгийн эрхийг хууль бусаар булааж авч болохгүй гэдгийг сануулсан байсан. Бид бүх шатны хууль хяналтын байгууллагаар шалгуулна. АН үндсэн хуулиа хамгаалж тэмцэнэ.” гэлээ.