АН-ын дотоод сонгууль өчигдөр болж, ҮБХ-нд өрсөлдөх эрхмүүдээ болон Нийслэлийн АН-ын даргаа сонгосон. Ингэхдээ Үндэсний бодлогын зөвлөлөөс Дархан, Дорнодын нэр дэвшигчдийн хувьд гэрээнд заасан үүргээ биелүүлээгүй учир түдгэлзүүлж санал хураалтад оруулаагүй.

Түүнчлэн АН-ын лидер, УИХ-ын гишүүн асан С.Баярцогтын нэрийг түдгэлзүүлэх шийдвэр гарсан. Энэ талаар АН-ын дарга С.Эрдэнэ “С.Баярцогтыг хөөх асуудал яриагүй. Хариуцлагын асуудал яриад эхлэхээр нөгөө талаас яриад байдаг. Хариуцлага тооцоод эхлэхээр асуудлыг гуйвуулаад янз бүрээр яриад эхэлдэг. Тиймээс бид цаашид хариуцлагатай хүчирхэг улс төрийн хүчин байхын төлөө явах болно гэдгээ дахин хэлье.

Дотоод сонгууль явагдаж байх үед иргэдээс гомдол, санал ирсэн. Нэг хүний шийдвэрээр ийм зүйл гараагүй. Аливаа шийдвэрийг гаргахад иргэдийн гомдол, санал, өргөдөл зайлшгүй хэрэгтэй байдаг” гэсэн. Гэвч Сэлэнгийн АН-ынхан дээрх шийдвэрийг хүлээн зөвшөөрөлгүй сонгуулиа зохион байгуулжээ. Ингэхдээ С.Баярцогтын нэрийг оролцуулан санал хураасан байна. Ингэснээр С.Баярцогт Сэлэнгэ аймагт нэгээр гарч, ҮБХ-ны гишүүнээр сонгогджээ.