Монгол улсын Ерөнхий Сайдын ивээл дор зохион байгуулагдах "СЭРГЭЭГДЭХ ЭРЧИМ ХҮЧНИЙ ҮНДЭСНИЙ НАЙМДУГААР ФОРУМ” 2017 оны тавдугаар сарын 05-ны өдөр “Corporate hotel and Convention center” -т зохион байгуулагдана. Тус форумын Ерөнхий зохион байгуулагчаар Сэргээгдэх эрчим хүчний үндэсний төв болон Монголын салхины эрчим хүчний ассоциаци, хамтран зохион байгуулагчаар Даян дэлхийн ногоон хөгжлийн байгууллага болон Дэлхийн салхины эрчим хүчний зөвлөл тус тус ажиллаж байна.
Мөн Эрчим хүчний яам болон Эрчим хүчний зохицуулах хороо форумын үйл ажиллагаанд бодлогын дэмжлэг үзүүлэн хамтран ажиллаж байна. Монгол Улс нь сэргээгдэх эрчим хүчний, тэр дундаа нарны болон салхины эрчим хүчний баялаг нөөцтэй орон билээ. Иймдээ ч сэргээгдэх эрчим хүчийг хөгжүүлэх боломж бидэнд бүрэн дүүрэн байна. Гагцхүү энэхүү салбарыг хөгжүүлэхийн тулд бодлого, төлөвлөлтийг сайтар хийх нь зүйтэй.
Монгол Улсад анхны их чадлын сэргээгдэх эрчим хүчний эх үүсвэр болох Салхитын салхин цахилгаан станцыг 120 сая Ам.Долларын хөрөнгө оруулалттайгаар 2013 онд ашиглалтанд оруулсан ба өнөөг хүртэл салхин цахилгаан станц нь Монгол улсын төвийн эрчим хүчний системийн 3 – 4 хувийг ханган ажиллаж байна.
2017 оны хувьд сэргээгдэх эрчим хүчний салбарт томоохон хөрөнгө оруулалтууд хийгдээд байна. Тодруулбал, 2017 оны Нэгдүгээр сард Монголын хамгийн анхны 10 МВт-ын нарны цахилгаан станц Дархан хот орчимд байгуулагдсан бол, Улаанбаатар хотын баруун хэсэгт 61-ийн гарам орчимд Эвридэй Ферм ХХК 10 МВт-ын нарны цахилгаан станцыг ашиглалтанд оруулахаар ажиллаж байна.
Мөн Өмнөговь аймгийн Цогтцэций суманд 50 МВт-ын хүчин чадалтай хоёр дахь салхин цахилгаан станцын барилгын ажил явагдаж байгаа. Үүнээс үзвэл Монгол улсын сэргээгдэх эрчим хүчний хүчин чадал 2017 оны эцэс гэхэд 120 МВт-д хүрэхээр байна.
Хэдийгээр Монгол улсад сэргээгдэх эрчим хүчний салбарт эерэг үр дүнгүүд гарч буй боловч шийдвэрлэх шаардлагатай бодлогын чанартай болон мэргэжлийн тулгамдсан асуудлууд байсаар л байна. Иймд тус сэргээгдэх эрчим хүчний үндэсний форум нь салбарын тухайн жилийн ололт амжилт, алдаагаа оноогоо дүгнэдэг чухал ач холбогдолтой хурал юм.
Тус форумд урьдчилан тооцоолсноор 500 гаруй гадаад, дотоодын зочид оролцох ба үүний дотор Дэлхийн салхины эрчим хүчний зөвлөлийн Ерөнхий нарийн бичгийн дарга ноён Стив Сауеэр холбогдох албаны хүмүүсийн хамт, БНХАУ улс болон Монгол улсыг хариуцан Бүгд найрамдах Австри улсаас Бээжин хотноо суугаа Элчин Сайд хатагтай Ирене Гинер-Райхл, Бүгд найрамдах Франц улсаас Монгол улсад суугаа Элчин сайд хатагтай Элизабет Барсак зэрэг хүндтэй зочид оролцохоо мэдэгдээд байна.
Энэ удаагийн форум нь үндсэн 4 салбар хуралдаанаас бүрдэх 20 орчим сэдвийг хөндөн хэлэлцэх ба үүний үр дүнд ирэх жилүүдэд сэргэгэдэх эрчим хүчний салбарт хийгдэх шаардлагатай ажлууд болон өнөөгийн тулгамдсан асуудлуудыг шийдвэрлэх гарцыг олоход чиглэх зорилготой.
Форумтай холбоотой нэмэлт мэдээллийг www.nref.mn вэб сайтаас авна уу.
