Ардчилсан нам Ерөнхийлөгчийн сонгуульд өрсөлдөх нэр дэвшигчдээ бүртгэж байна. Тэгвэл дөнгөж сая Монгол Улсын Ерөнхий сайд асан Н.Алтахуяг Ардчилсан намаас Ерөнхийлөгчид нэр дэвших хүсэлтээ албан ёсоор илэрхийлж, бүртгүүллээ.

Тэрбээр энэ үеэр "Сонгуулийн тухай хуулийн дагуу нэр дэвшүүлэлт өнөөдөр эхэлж байна. АН-аас нэр дэвшигч тодрохын тулд дотоод сонгуульд гишүүдийнхээ санал асуулгад оролцох ёстой. Тэр санал асуулга маргааш болно. Тэндээс хамгийн их санал авсан хүн намын Их хурлаар орж, санал хураагдах учиртай.

Би нэр дэвших болсон шалтгаанаа зургаан сарын өмнөөс тайлбарласан.  Хамгийн гол нь Монгол Улс улс шиг улс болж, ард түмэн маань хүн шиг амьдрах хэрэгтэй байна. 2012 онд Ардчилсан намын дэвшүүлсэн зорилт хараахан хэрэгжиж чадаагүй, тасарсан. Тиймээс хүн шиг амьдарч, улс шиг хөгжихийн тулд Монгол Улсын Ерөнхийлөгчийн үүрэг оролцоо чухал. Тиймээс энэ бүхэнд одоогийн Ерөнхийлөгчийн сонгууль маш чухал үүрэгтэй. Харамсалтай нь түүний дагуу явах нь уу, үгүй юу гэдгийг хэлж мэдэхгүй байна.

Эрдэнэтийн 49 хувь дээр нэг хэсэг нь эсэргүүцэж, нэг хэсэг нь хамгаалсан зодоон цохионтой сонгууль битгий болчихоосой гэж бодож, би өөрийнхөө нэрийг дэвшүүлсэн. Үүнээс өөр Монгол Улсад шийдвэрлэх асуудал олон байна. Ялангуяа монголчуудыг хооронд нь талцуулж, хэрэгтэй, хэрэггүй юмаар хоорондоо хоёр, гурав хуваагдаж тэмцэлдүүлээд байдаг олон зүйл бий. Үүнийг нэгтгэн нийлүүлж, нэгдсэн хүчирхэг монголчууд бий болоход Ерөнхийлөгчийн үүрэг оролцоо маш их чухал. Бид чинь гуравхан саяулаа ч асар их түүхтэй ард түмэн. 

Түүх соёл, өв уламжлалын асуудлаа Монгол Улсын Ерөнхийлөгч онцгой анхаарч ажиллах ёстой. Гэтэл үүнийг асар их хоцорч байгаа гэж би боддог. Гуравдахь нь монголчууд бид монголдоо сайхан амьдрахын тулд цөөхөн нь идэж, олонх нь ядуурдаг биш. Яавал дундаж давхаргыг бий болж, нэлээд олон хүн боломжийн амьдрах уу гэдэг эдийн засгийн бодлогыг гаргахын төлөө Ерөнхийлөгч оролцох ёстой болохоос биш олон толгойны зодоонд оролцоод явдаг байх ёсгүй гэж бодож байгаа.

Би энэ гурван чиглэлийн үндсэн дээр л Ерөниийлөгчид нэр дэвшиж Монголын нийгмийг эрүүлжүүлэх, Монгол Улсын 1990 оны сонголтынхоо замаар зөв зохистой үргэлжлэхэд нь өөрийн хүч боломж, олж авсан туршлага, алдаа оноогоо ашиглан хийж чадна гэсэн итгэлтэй байгаа. Тийм учраас нэр дэвшиж байна" гэлээ.

Б.Батчимэг