УИХ-ын чуулганы нэгдсэн хуралдаанаар Төрийн албаны тухай хуулийн төслийг /шинэчилсэн найруулга/ хэлэлцэж эхлээд байна. Эл төслийг УИХ-ын гишүүн Д.Тогтохсүрэн санаачилсан юм.

Төсөлд төрийн албаны мэргэжлийн шалгалтыг Засгийн газрын хэрэг эрхлэх газар авдаг байх зохицуулалт тусгажээ. Одоогийн хуулиар Төрийн албаны зөвлөлөөс шалгалтыг авдаг юм. Харин Төрийн албаны зөвлөл нь дээрх төслөөр хяналт тавих статустай байхаар оруулж иржээ. Ингэснээр ТӨЗ төрөөс хараат бус байх боломжтой аж.

Мөн төрийн албанд тавигдах нийтлэг шаардлага нь дээд боловсролтой, Монгол Улсын иргэн байх, авлига, албан тушаалын гэмт хэргээр ял шийтгүүлж байсан бол төрийн албанд орох эрхийг хаажээ. Ялын хугацаа дууссан байсан ч орох боломжгүй аж. Түүнчлэн төрийн албан хаагчдыг шат ахиулан дэвшүүлдэг байхаар заажээ. Үүнд ТӨЗ хяналт тавих бөгөөд хууль бусаар томилсон бол хүчингүй болгох эрхтэй байх гэнэ.

Сонгууль болгоны дараа төрийн албан төрлийн, намын алба болж хувирдаг. Тэгэхээр Төрийн нарийн бичгийн даргыг 6 жилээр томилоно. Хэрвээ хууль бусаар ажлаасаа халагдвал тухай хүний цалин болон нийгмийн даатгалыг хууль зөрчигч өөрөө төлнө. Хариуцлагыг төрийн бус байгууллагууд хянана. Мөн Олон нийтийн зөвлөл гэж байгуулна. Мэдлэг, боловсрол ажлыг нь үнэлж төрийн албанд оруулна.