Олон нийтийн сүлжээгээр Сангийн сайдын нэр зургийг ашиглан хуурамч хаяг нээж, худал мэдээлэл тараасантай холбогдуулан Б.Чойжилсүрэн сайд дөнгөж сая мэдээлэл хийлээ.

Тэрбээр "Өчигдөр 16:30 цагийн орчмоос эхлээд Сангийн сайд Чойжилсүрэн гэсэн хуурамч хаягнаас Худалдаа хөгжлийн банктай холбоотой ор үндэслэлгүй гүтгэлгийг олон нийтийн сүлжээгээр тарааж эхэлсэнтэй холбоотой мэдээлэл хийж байна.

Өчигдөр намын бүлэг нээлттэй хуралдсан. Ингэхдээ би хоёр асуудал танилцуулсан. 2018 онд төсвийн хүрээний мэдэгдэл,  2019-2020 оны төсвийн төсөөллийн тухай хуулийн төслийн танилцуулгыг танилцуулсан. Мөн 2018 онд Монгол Улсыг хөгжүүлэх нийгэм эдийн засгийн хүрээний төслийг энэ долоо хоногт байнгын хороогоор хэлэлцэх учраас гишүүдийн асуултад хариулсан. Харин арилжааны ямар нэгэн банктай холбоотой мэдээлэл бүлгийн хуралд өгөөгүй. Олон нийтийн сүлжээгээр яваад байгаа зүйл огт яригдаад учраас няцаалт хийж байна. Яагаад энэ няцаалтыг хийж байгаа вэ гэвэл банкны салбар эмзэг, итгэл, хүлээлт дээр тогтдог. 

Худалдаа Хөгжлийн Банк бол манай улсын том банкуудын нэг. Тус банктай холбоотой ийм зүйл болоогүй гэдгийн та бүхэнд албан ёсоор мэдэгдэж байна" гэв.

Энэхүү мэдээллийн дараа тэрбээр сэтгүүлчдийн сонирхосон асуултад хариулт өглөө.

-Эрдэнэт үйлдвэрийг худалдаж авсан асуудалтай холбоотой ХХБ дээр шалгалтын ажлын хэсэг гарчихсан байгаа. Энэ шалтгалтын дүн хэзээ гарах бол?

-ХХБ-тай холбоотой зүйл байхгүй. Харин Эрдэнэт үйлдвэрийн 49 хувийг худалдаж авсантай холбоотой УИХ-ын тогтоол гарсан. Энэ тогтоол дээр ЗГ 49 хувийг худалдаж авсан талтай хэлэлцээр хийж, төрд авах тал дээр хэлэлцээр явуул гэсэн үүрэг өгөгдсөн. Энэ дагуу ажил явагдаж байгаа. ХХБ-тай ямар нэгэн шууд холбоо байхгүй.

-Хуурамч хаягийг хаана хэн нээсэн гэдгийг олж тогтоосон уу?

-Одоогоор тогтоогоогүй байгаа. Цагдаа тагнуулын байгууллагад албан ёсоор хандсан. Шалгалтын дараа тодорхой болох байх.

-Таны албан ёсны хаяг ямар хаяг байдаг вэ?

-Надад сошиал ертөнцад албан ёсны хаяг байхгүй. Ер нь сонгууль төхөхөөр ийм хуурамч хаяг олширдог. Түүний нэг л болж байх шиг байна.

-Энэ мэдээлэлтэй холбоотой сөрөг үр дагавар гарсан уу. Та бүхэн банктай холбоотой мэдээлэл авсан уу?

-Яамны ажилчид авсан гэж найдаж байна. Гэхдээ өчигдөр мэдээлэл гарч, өнөөдөр няцаалт хийж байгаа учраас бодит хохирол гайгүй байх гэж найдаж байна. ХХБ Монголбанкнаас тавигддаг бүх шалгуурыг ханган ажиллаж байгаа банк.

Б.Энхжин