УИХ-ын чуулганаар зургаан улсад суугаа Элчин сайдыг эргүүлэн татаж шинээр томилох асуудлыг хэлэлцлээ. Тодруулбал, Швейцараас В.Пүрэвдорж, Францаас М.Батсайхан, Германаас Ц.Болор, Японоос С.Хүрэлбаатар, АНУ-аас Б.Алтангэрэл, Канадаас Р.Алтангэрэл нарыг эгүүлэн татлаа. Улмаар Ерөнхийлөгчийн зөвлөх Л.Пүрэвсүрэнг 60.4 хувийн саналаар Швейцарь, Ерөнхийлөгчийн зөвлөх А.Баттөрийг 88.2 хувийн саналаар Франц, ҮАБЗ-ийн Стратегийн судалгааны хүрээлэнгийн захирал Д.Ганбатыг 78.4 хувийн саналаар Герман, Гадаад харилцааны дэд сайд асан Г.Тэнгэрийг 96.1 хувийн саналаар Япон, Боловсрол, соёл, шинжлэх ухаан, спортын дэд сайд Ё.Отгонбаярыг 100 хувийн саналаар АНУ, Ерөнхий сайдын Эдийн засгийн бодлогын зөвлөх Н.Чимгүүндарийг 96 хувийн саналаар Канад улсад суух Элчин сайдаар томиллоо. Санал хураалт явуулахын өмнө УИХ-ын гишүүд Элчин сайдад нэр дэвшигчдээс асуулт асууж, саналаа хэлсэн юм.
УИХ-ын гишүүн Ж.Батзандан “"Орж ирж байгаа хүмүүсийг харахад гадаад харилцааны салбарт, төрийн албанд ажиллаж нэлээд туршлага хуримтуулсан хүмүүс харагдаж байна. Гэхдээ хоёр зүйлийг захиж хэлмээр байна. Элчин сайд болчихоод томилогдсон хүндээ үйлчилж, хэдэн дарга нарт долигнож гүйдгээ болих хэрэгтэй. Тэнд байгаа ад иргэддээ үйлчлэх хэрэгтэй. Тэнд байгаа монголчуудтайгаа уулзахгүй, гадаадад өргүүлсэн хүүхдийнхээ эрх ашиг, монголчуудынхаа анхаарахгүй байна. Тиймээс энэ асуудалд анхааралтай ажиллаж, томилсон хүмүүсийнхээ цүнхийг барьж, бялдуучилж гүймээргүй байна. Зөв шударга, шинэ ажил хийгээрэй гэж захимаар байна. Мөн Монгол Улс бол ОХУ, БНХАУ хоёр улсын хооронд оршдог цорын ганц ардчилсан орон. Монголын ард түмэн ардчиллын замыг сонгосныхоо төлөө ардчилсан улс орнуууд руу визгүй зорчих эрхтэй.
Хоёр хөрш рүүгээ визгүй зорчдог АНУ, Англи, Европын холбооны улсууд руу болохоор виз хүсдэг, нөгөөх нь олгодоггүй байдлыг халах ёстой. Бид адилхан үнэт зүйл сонгосныхоо төлөө шагналаа авах ёстой. Сирийн сая цагаач, Канад 30 мянган иргэнийг визгүй авдаг хэрнээ Ардчилсан Монгол улсын алаг үздэг улс орнууддтай ярих цаг болсон гэдгийг Гадаадын харилцааны сайд болон элчин сайдуудад хэлмээр байна. МУ-ын эрх ашиг гэдэг бол хэдэн даргынх биш. 3 сая жирийн ард түмний эрх ашиг юм. Очсоныхоо маргаашнаас эхлээд хэний төлөө ажиллахаа сайн бодоорой. Сонгосон, томилсон, нэр дэвшүүлсэн дарга нартаа үйлчлээд байв. МУ-ын Ерөнхийлөгч хувь биш шүү. Үеийн үед байх албан тушаал гэдгийг зөвөөр ойлгож ажиллаарай” гэв.
Сэтгэгдэл (5)