УИХ-ын гишүүн О.Баасанхүүгийн зураг бүхий “О.Баасанхүү” гэсэн цахим хуудаснаас худал цуурхал тарааж байгаатай холбогдуулан О.Баасанхүү гишүүн мэдээлэл хийлээ.
Тэрбээр “Миний нэрийг ашиглаж, ФБ хуудас нээн Худалдаа хөгжлийн банкийг удахгүй дампуурах гэж байгаа тухай бичсэн байна. Энэ бол миний албан ёсны facebook хаяг биш. Миний нэрээр хуурамч хаяг нээн дээрх мэдээллийг цацсанд харамсаж байна. Би үүнийг асар ноцтой гэж үзэж, ТЕГ-т шалгуулахаар хандсан. Ялангуяа өмнө нь Сангийн сайд Б.Чойжилсүрэнгийн нэрээр хуурамч хаягнаас мөн бичсэн байсан. Одоо миний нэрээр гаргаж байгаа нь зохион байгуулалттай үйлдэл гэж үзэж байна. Аливаа банк итгэлцэл, бусдын хадгаламж дээр суурилж үйл ажиллагаагаа явуулдаг. Одоогийн байдлаар надад болон УИХ-д ямар нэг банкны нөхцөл байдал хүндэрсэн, тодорхой хэмжээгээр дампуурахад бэлэн болсон гэдэг мэдээлэл ирээгүй гэдгийг хэлмээр байна. Үүнийг албан ёсоор мэдэгдэхгүй бол нийгэмд таавар, замбараагүй байдал үүснэ. Сонгууль дөхөөд ирэхээр энэ мэт балайрал хэрээс хэтэрч байна. Ерөнхийлөгчийн сонгууль ойртсонтой холбоотой эдийн засгийг савлуулах гэсэн иймэрхүү үйлдлийг зогсоох болно” гэсэн юм.
Тэрээр ТЕГ-аас хариу ирэхээр дахин мэдээлэхээ хэллээ.
Ш.Даваа
Сэтгэгдэл (8)