БСШУС-ын сайдын асуудлыг Засгийн газар шуурхайлан шийдвэрлэж, Ж.Батсуурийг ёстой нэг ногоон гэрлээр огцруулж дөнгөв.  Номхон тэмээг ноолох амар гэгчээр буурь суурьтай  хүнээр нь далимдуулж огцруулж байна. Өндөр шаардлагатай, хариуцлагатай байя гэж байгаатай санал нийлж байна. Гэхдээ зөв жишгийг буруу хүнээс эхлүүлж байна хэмээн УИХ-ын цөөнгүй гишүүд шүүмжилж байсан ч тэд 63,4 хувийн саналаар сайдаас нь огцоруулав. Ж.Батсуурь бол мэргэжлийн гэх тодотголтой Засгийн газрын дан дээлтэй сайд. Тиймдээ ч УИХ-ын гишүүн Д.Эрдэнэбат “Ж.Батсуурь сайдыг огцруулах асуудалд мөн ч олон зүйл бодогдож байна.

Хэрвээ тест задарсан үндэслэлээр огцруулж байгаа бол Сангийн яам, БХЯ, ЭМЯ гээд асуудал байгаа. Би Ж.Батсуурь сайдыг мэднэ. Огцрууллаа гэхэд “за” гээд явах хүн.  Ж.Батсуурь сайдыг огцрууллаа гэхэд дараагийн сайд ”давхар” дээлтэй байхгүй шүү. Ж.Батсуурь дан дээлтэй сайд байсан. Тиймээс дан дээлтэй сайд оруулж ирэхийг АН-ын бүлгийн өмнөөс шаардаж байна” гэв. Мөн түүнийг чуулганы хуралдаанаар огцруулсны дараа УИХ-ын дарга М.Энхболд “Зөвхөн сайдад нь хариуцлага тооцоод өнгөрөх биш шат дараатайгаар хариуцлага тооц. Цаашид хариуцлагыг чангалах ёстой. Засгийн газар нь өөрийн байгууллагынхаа хүрээнд хариуцлага тооцож, өгсөн үүрэг даалгавараа эргэж хардаг, ажлаа дүгнэдэг баймаар байна. Өнгөрсөн дөрвөн жил энэ байдал алдагдсан.

Тиймээс үүнийг таслан зогсоох ёстой. Дараагийн сайдыг яаралтай оруулж ирэх хэрэгтэй. Ерөнхий сайд өнөөдөр захирамж гаргаж, үүрэг гүйцэтгэх сайдыг томил” гэсэн. УИХ-ын даргын үгээр бол өнөөдөртөө багтаж БСШУС-ын сайдын үүрэг гүйцэтгэгч тодрох нь. Мөн дараагийн сайд яаралтай горимоор томилогдох нь. Харин Ерөнхий сайд Ж.Эрдэнэбат Петербургийн олон улсын эдийн засгийн чуулга уулзалтад оролцохоор өнөөдөр ОХУ-ыг зорьж буй. Тэрбээр явахаасаа өмнө сайдын үүрэг гүйцэтгэгчийг томилох хүндтэй үүргээ гүйцэтгэчихээд явах нь лавтай бизээ. Учир нь Ж.Батсуурь сайдын суудлаасаа гүйцэт босч амжаагүй байхад л дараагийн сайдын нэрс дуулдаж эхэллээ. МАН-ынхан БСШУС-ын яаманд хоёр сайд тавина. Харин тэдгээр сайдуудын нэг нь эмэгтэй байх бөгөөд УИХ дотроосоо буюу давхар дээл нөмрүүлэхээр санаархаж байгаа талаар эх сурвалжууд онцлоод байнаа. Түүнээс гадна өмнө нь УИХ-ын гишүүн, гадаадад элчингээр томилогдож байсан нэгэн эрхмийн ч нэр яригдаж байна. Тодруулбал УИХ-ын гишүүн Ц.Цогзолмаа, Т.Ганди зэрэг нэрс явж байна. Мөн дэд сайдаар НИТХ-ын төлөөлгч Г.Ганбаярын нэр эртнээс сонсогдож байна. Ямартай ч яаралтай горимоор орж ирэх БСШУС-ын дараагийн сайд хэн бэ гэдэг таамаг ойрын өдрүүдэд тодорхой болох бизээ.

Б.Өрнөх