“Монголбанкинд хийсэн шалгалттай холбогдуулан авах арга хэмжээний тухай” УИХ-ын тогтоолын төслийг өчигдөр УИХ-ын Эдийн засгийн байнгын хорооны хуралдаанаар хэлэлцэх үеэр УИХ дахь АН-ын бүлэг тав хоногийн завсарлага авчээ.

УИХ-аас байгуулсан Ажлын хэсэг тус банкинд хийсэн хяналт шалгалтын үр дүнд Монголбанкны алдагдал жилд 2-3 дахин нэмэгдсэнээр 2012-2016 онд 3.1 их наяд төгрөгийн хуримтлагдсан алдагдал үүссэн гэж дүгнээд байгаа юм. Холбогдох хууль тогтоомжийн дагуу дээрх алдагдлыг улсын төсвөөс нөхөх нөхцөл үүсээд байгаа аж. Монгол Улсын нэгдсэн төсвийн ачааллаас үүдэн Төв банкны дээрх хэмжээний алдагдлыг улсын төсвөөс хаах боломжгүй учир тус банкны хуримтлагдсан алдагдлыг хэрхэн барагдуулах талаар болон уг алдагдлыг үүсгэн төрд хохирол учруулсан этгээдүүдэд хуулийн хариуцлага тооцуулахад дээрх тогтоолын төсөл чиглэгдсэн юм.

Харин УИХ дахь АН-ын бүлгийн зүгээс уг асуудалтай нарийвчлан танилцаж, тал бүрийн байр суурийг сонсох шаардлагатай гэж үзээд тав хоногийн завсарлага авч буйгаа мэдэгдсэн байна. УИХ-ын гишүүн Д.Эрдэнэбат “Төв банкны хувь заяатай холбоотой энэ асуудлаар УИХ яаран тогтоол шийдвэр гаргах нь зохимжгүй. Хэлэлцэж буй тогтоолын төсөлтэй УИХ-ын гишүүд нарийвчлан танилцах, Ажлын хэсгийн тайлбар болон Монголбанкны байр суурийг сонсох шаардлагатай” гэжээ.