МАН-хан Төрийн эрхэнд гарсан даруйдаа л хариуцлагын тухай ярьж, гэрээ хүртэл байгуулсан. Ажлаа хийж чадахгүй бол зайгаа тавих ёстой гэсэн зарчмын дагуу Боловсролын сайдад хариуцлага тооцож, огцруулсан нь улс төрийн хувьд сайн жишиг гэдгийг хэлэх хүн цөөнгүй байна. Үнэндээ улс төрийнхөн хариуцлагын тухай ягштал ярьдаг хэрнээ хэрэгжүүлж байсан түүх ховор.

Харин мэргэжлийн гэх тодотголтой Ж.Эрдэнэбатын Засгийн газар кабинетынхаа сайдад хариуцлага тооцох ажлыг эхлүүллээ. Боловсрол,соёл, шинжлэх ухаан, спортын сайд Ж.Батсуурийг алдаа гаргаж, хариуцлага алдсаных нь төлөө огцруулав. Товчхондоо, төрийн ажлыг цалгардуулж, алдаа дутагдал гаргасан удирдах албан тушаалтан ажлаа өгдөг, огцордог шинэ соёлын үрийг тэр тарив. Гэхдээ энэ үр соёолоход кабинетынх нь хэд хэдэн сайд саад болж байгааг иргэд дуулгасаар байна.

Хүүхэд сурах, чанартай боловсрол эзэмших нь чухал. Гэхдээ түүнээс илүү хүн амьд явах эрхтэй. Тэгвэл Монголчуудын амьд явах эрхийг хамгаалж чадахгүй байгаа Эрүүл мэнд болон Батлан хамгаалахын салбарын удирдлагуудад хэзээ хариуцлага тооцох вэ гэдэг асуултын хариултыг иргэд нэхсээр байна.

Учир нь сар гаруйн өмнө Төв аймгийн Алтанбулаг сумын нутагт байрлах Таван толгой дахь Зэвсэгт хүчний сургалтын төвд хээрийн сургуулилт хийж байсан Зэвсэгт хүчний 350 дугаар ангийн хоёр албан хаагч гар бөмбөг дэлбэрсний улмаас амиа алдаж, найман албан хаагч шархадсан харамсалтай хэрэг гарсан билээ. Мөн Дорноговь аймгийн Зүүн Баянгийн 336-р ангид цэргийн алба хаахаар явсан Ж.Баярцогт ээлжийн ахлагчдаа зодуулж, өвлийн шөнө гадаа нүцгэн зогссоны улмаас хөл нь хөлдөж, 9 хуруугаа тайруулсан хэрэг гарсан.

Түүнийг шөнийн ээлжинд гарч байхдаа харуулын байранд гал түлж дулаацсаных нь төлөө харуулын ахлагч Энхцолмон шийтгэсэн нь дээрх нөхцөл байдалд хүргэсэн байдаг. Тиймдээ ч УИХ-ын гишүүн Б.Пүрэвдорж Батлан хамгаалахын сайд Б.Бат-Эрдэнэд хариуцлага хүлээлгэж, огцруулах саналаа Ерөнхий сайд Ж.Эрдэнэбатад хүргүүлж, тангараг өргөсөн цэрэг энх цагт осолдоно гэдэг салбар сайдын алдаа гэж үзээд ийнхүү огцруулахыг шаардсан ч өнөөг хүртэл түүнд ямар нэгэн хариуцлага тооцоогүй билээ. Түүнчлэн химийн хортой бодист хордож нас барсан хүмүүсийн амийг аварч чадаагүй Эрүүл мэндийн сайд А.Цогцэцэгт ч мөн хэзээ хариуцлага тооцохыг иргэд шаардсаар байна.

Б.Өрнөх