УИХ-ын чуулганы нэгдсэн хуралдаан эхэллээ. Хуралдааны эхэнд УИХ-ын дэд дарга Ц.Нямдорж хэлэлцэх асуудлын дарааллыг танилцуулав. Өнөөдрийн чуулганаар  Шүүхийн шийдвэр гүйцэтгэх тухай, Прокурорын тухай хуулийн төсөл тэргүүтэй 10 гаруй асуудлыг хэлэлцэн шийдвэрлэх аж. Хэлэлцэх асуудлын дараалалтай холбогдуулж УИХ-ын гишүүн Л.Болд өнөөдөр эхэлж, дөрвөн өдөр үргэлжлэх JCI байгууллагын Ази, Номхон далайн бүсийн чуулга уулзалт /АСПАК/ Монгол Улс, Улаанбаатар хотноо болж байгааг онцлоод энэ үеэр төв талбайд газар шорооны ажил хийж байгааг буруутгав. Дэлхийн 40 орчим орноос 3000 гаруй залуу лидер оролцож, "Дэлхий Монголд" чуулж байхад эсэргүүцэж байгаа мэтээр ийнхүү газар сэндийчэж байгаа талаараа тодорхой тайлбар хийхийг хүслээ. Улмаар Нийслэлийн Засаг дарга, Байгаль орчин, аялал жуулчлалын сайд хамтран мэдээлэл өгөхийг шаардсан юм. 

УИХ-ын гишүүн О.Баасанхүү Онцгой албан татварын тухай хуульд өөрчлөлт оруулах тухай хуулийн төслийг хэлэлцэж, приус машины татварыг хойшлуулах асуудлыг яаралтай шийдэх нь зүйтэй гэв. Приус машины татварыг эсэргүүцэж өөрийн машиныг шатаасан хүнийг чанга дэглэмтэй хорих ангид хууль бусаар хорихоо больж суллахыг шаардлаа. 

Харин үүний хариуд УИХ-ын дэд дарга Ц.Нямдорж Сүхбаатарын талбайд 150 машины зогсоол барьж байгаа, удахгүй дуусна. Хэлэлцэх асуудлын дараалалд Онцгой албан татварын тухай хуульд өөрчлөлт оруулах тухай хуулийн төсөл багтаж байгаа бөгөөд приус машины татварыг хэлэлцэнэ гэлээ.