УИХ-ын чуулганы нэгдсэн хуралдаанаар БСШУС-ын сайдыг томилох асуудлыг хэлэлцлэлээ. Ерөнхий сайд Ж.Эрдэнэбат БСШУС-ын сайдад Г.Чулуунбаатарыг санал болгож буйгаа УИХ-ын чуулганд танилцуулж, улмаар нийт гишүүдийн 94,2 хувийн саналаар Г.Чулуунбаатар БСШУС-ын сайдаар томилолоо.

Хэлэлцэж буй асуудалтай холбогдуулан асуулт асууж хариулт авлаа.

Х.Баатарсайхан: Их дээд сургуулийн агуулга чанар дээр анхаараач. Бараг 10 дугаар анги төгссөн хүүхдүүдээс долоон дор оюутнууд төгсч байна. Зөв бичиж чаддаггүй оюутнууд их байна. Ажлын байран дээр гараад хангалтгүй байна. Гологдож байна.

А.Сүхбат: Ж.Батсуурь сайдын үед ярьж байсан.  Боловсролын салбарын системийг сайжруулмаар байна. Цэцэрлэгийн үнэ их дээд сургуулийн үнээс давсан байна.  Үүнийг яаж зохицуулах вэ?

Г.Чулуунбаатар: Боловсролын салбарт тогтолцооны шинэчлэл зайлшгүй хийх шаардлага байна. Өөрчлөл хийхийн төлөө ажиллана. Чанар болон агуулга, үр дүн хосрын уялдааг хангахын төлөө хичээнэ.

Д.Тэрбишдагва: Энэ яам дөрвөн чухал салбарыг зангиддаг. Соёл, түүхийн салбарт онцгойлон анхаарай. Эрдэмтэн хүн очиж байгаа юм байна. Гэхдээ сайд гэдэг бол нэг талаараа улстөрч нөгөө талаараа сайн менежер байх учиртай.  Улаанбаатар хотын сургууль, цэцэрлэгийн ачаалал хэд дахин илүү байна. Тэнд ажиллаж байгаа ажилтнуудын ажлын нөхцөл амаргүй байдаг тул бүх салбарын нэгжүүдээр яваарай. Ширээний ард суугаад ном бичих, газар дээр ажиллах хоёр өөр шүү. Боловсролын яаманд тулгамдаад байгаа нэг асуудал бол бүтээгч монголчуудыг бэлтгэх. Борооны дараах мөөг шиг их, дээд сургуулиудтай болчихоод байна. Гэвч үйлдвэр аж ахуйн салбарт ажиллах мэргэжлийн боловсон дутагдалтай байна. Их дээд сургууль, хүрээлэнгүүдийнхээ асуудлыг цэгцлээрэй.  Хэн сайд болно тэрэн дээр гүйж очоод байдаг захирлууд  байдаг шүү.

Г.Тэмүүлэн: Улс орны ирээдүй залуучууд, хүүхдүүдээс хамаардаг. Одоогоос сарын өмнө Залуучуудын хуулийг баталсан. Боловсролтой, хүмүүжилтэй холбоотой заалтууд нэлээд орсон. Үүн дээр анхаарч ажиллаарай.

Д.Ганболд: МУ-ын хөгжлийн цөм нь сургуулийн өмнөх боловсрол. Суурь нь сайн байвал улс хөгжих үндэс зөв тавигдана гэсэн үг. Мөн их, дээд сургуулийг цэгцлэмээр байна. Магадлан итгэмжлэл аваагүй сургууль их байна. Гарсан бүтээгдэхүүн нь чанаргүй байна. Үдийн цай, хоолны хөтөлбөрт анхаарал хандуулаарай. Зарим хүмүүсийн бизнес болоод байна. Бас бүтээн байгуулалтыг орхиж болохгүй.  

Л.Болд: Дээд боловсролын талаар нэлээд олон хүн ярилаа. Нийслэл ачаалал дийлэхээ байсан. Оюутны хичээл тарахаар л гудамж талбай арай сийрэг болж байна. Энэ тогтолцоо бол буруу юм. Уг нь Багануурт төсөл хэрэгжүүлэхээр ярьсан боловч өнөөг хүртэл хийсэн юмгүй байна. Мөн та бас давхар соёлын сайд болж байгаа шүү. Боловсролоо соёлтой нийлүүлснээр бид олон зүйл алдаж байгаа. Соёл гэдэг бол маш том салбар. Дээр нь спортын сайд. Олимпийн бэлтгэл ажил эхлэх гэж байна.

24tsag.mn