Шударга сонгуулийн төлөө иргэний нийгмийн хяналт сүлжээнээс өнөөдөр Ерөнхийлөгчид нэр дэвшигчдийг санхүүжилтээ ил тод зарлахыг уриалжээ. Үндэсний Аудитын газраас Ерөнхийлөгчид нэр дэвшигчийн зардлын дээд хэмжээг нам 6.8 тэрбум, нэр дэвшигч 3.9 тэрбум төгрөг байхаар тогтоосон.

Өөрөөр хэлбэл, нэг дэвшигч нийт 10.7 тэрбум төгрөг зарцуулах эрхтэй. Тиймээс 2017 оны Ерөнхийлөгчийн сонгуульд гурван хүн нэр дэвшиж байгаа тул нийт 32.1 тэрбум төгрөг зарцуулах магадлалтай хэмээн тус сүлжээ үзэж байгаа аж. Нэр дэвшигчид болон намууд энэ хэмжээний мөнгийг бие даан гаргаж чадахгүй байх магадлалтай тул ашиг сонирхлын зөрчлөөс урьдчилан сэргийлэх зорилгоор санхүүжилтээ ил тод зарлахыг уриалж байгаа юм.

Түүнчлэн тус сүлжээнээс Ерөнхийлөгчийн сонгуулийн сурталчилгаа албан ёсоор эхэлсэн өдөр буюу энэ сарын 06-09-ний хооронд нэр дэвшигчдийн Хөрөнгө, орлогын мэдүүлэг (ХОМ)-ийн тухай мэдээллийг авах хүсэлтийг СЕХ-нд хоёр удаа хүргүүлжээ.

Гэвч уг асуудал АТГ-тай холбоотой тул СЕХ хариу өгөх боломжгүй гэжээ. Тиймээс өнөөдөр Шударга сонгуулийн төлөө иргэний нийгмийн хяналт сүлжээнээс АТГ-т Ерөнхийлөгчид нэр дэвшигчдийн ХОМ-ийг нийтэд ил, тод зарлах хүсэлт хүргүүлэх болсон байна.