Өчигдөр хуралдсан МАН-ын Бага хурлаар төлөвлөж байсан ёсоор Ө.Энхтүвшинг даргаар сонгожээ. Хурлын үеэр хуучин дарга С.Батболдыг солих шаардлагагүй гэсэн санал хүсэлт гарч байсан ч ийнхүү удирдлагаа өөрчилсөн байна. Намын бодлогоор УИХ-ын гишүүн Ө.Энхтүвшинг, харин заалнаас УИХ-ын гишүүн асан Р.Рашийг нэр дэвшүүлж, өрсөлдүүлжээ. Харин санал хураахад Ө.Энхтүвшин 89 хувийн санал авч даргаар сонгогдсон байна. Залуучууд сонгуульд олон суудал авч чадаагүйг намын удирдлагуудтай хариуцлага тооцож, намын даргаар шинэ хүн томилно гэх яриа мэр сэр гаргаж байсан ч энэ нь газар аваагүй бололтой, мөн л урьдчилсан зохиосон сценараар Ө.Энхтүвшин ийнхүү сонгогдсон байна. Мөн С.Батболд, Ү.Хүрэлсүх нар болон Удирдах зөвлөлийн гишүүдийг үүрэгт ажлаас нь чөлөөлсөн ийм хурал болжээ. Мөн зарим хурлын төлөөлөгчид зөвхөн намын удирдлагуудыг өөрчлөөд зогсохгүй УИХ-ын гишүүнээс нь татах ёстой ч гэж шүүмжилсэн байна.

   Энэ хурлаар өнгөрсөн сонгуульд МАН-ынхан яагаад ялагдсан талаар хүчтэй санал, шүүмжлэл өрнөж, үүндээ дүгнэлт хийсэн тул ерөнхий нарийн бичгийн даргыг сонгож амжаагүй юм. Тиймээс өнөөдөр 12 цагт үргэлжлүүлэн хуралдахаар болсон байна.

   Хамгийн сонирхолтой нь энэ хуралд АНУ-д биеэ эмчлүүлээд ирсэн С.Баяр, АТГ-т хоригдож байсан Ц.Анандбазар нар ирсэн байсан тухай зарим эх сурвалжууд хэлж байна. Ц.Анандбазарыг батлан даалтанд гарсан, үгүй гэх эргэлзээтэй мэдээллүүд гарч байсан юм.