Кино найруулагч, СТА Г.Бадамрагчааг тагнуулынхан төрийн эрхийг хууль бусаар авахыг оролдсон гэх хэргээр цагдан хориод гурван сарын хугацаа өнгөрөөд байна. Харин түүний хэргийг хэрэгсэхгүй болгоно, суллана хэмээн хэвлэлээр цацагдсан. Гэвч уг мэдээллийг ташаа болохыг ТЕГ-ынхан мэдэгдлээ. Түүний хэргийн мөрдөн байцаагч одоогоор хөдөө яваад эзгүй байгаа юм байна. Г.Бадамрагчааг ТЕГ-ын Мөрдөн байцаах хэлтсээс Эрүүгийн хуулийн тусгай ангийн 82 дугаар зүйлд заасны дагуу эрүүгийн хэрэг үүсгэн, түүнтэй хамтран ажилладаг арав гаруй хүнийг сэжигтнээр шалгаж байгаа. Мөн үндсэрхэг залуусын бүлгэмийн толгойлогчдын нэг М.Гансүрэнг холбогдуулан шалгаж байгаа юм.
Г.Бадамрагчааг цагдан хоригдсоноос хойш ар гэрийнхэн болон найз нөхөд, хамт ажиллагсад нь улс төрийн зорилготой, хэлмэгдүүлж байна хэмээн мэдэгдсээр ирсэн. Харин ТЕГ-аас “Г.Бадамрагчаа нарын хэрэг хуулийн хүрээнд, прокурорын хяналтад шалгагдаж байгаагийн зэрэгцээ уран бүтээлтэй нь холбогдуулж, эсвэл улс төрийн бусад шалтгаанаар баривчилсан гэх яриа үндэслэлгүй. Эрүүгийн хэрэг үүсгэх хангалттай үндэслэл байсан учир хэрэг үүсгэн, болзошгүй хор хохирлоос сэргийлэх үүднээс таслан зогсоох арга хэмжээ авч, Г.Бадамрагчааг баривчилсан. Төрийн эрх мэдлийг хууль бусаар авах хуйвалдаан зохион байгуулах гэмт хэрэг үйлдэхээр бэлтгэж байсан Г.Бадамрагчаа нарын хэрэг нь зохион байгуулалттай бүлэг гэдэг утгаараа ноцтой хэрэг” хэмээн мэдэгдсэн билээ.
Б.Чимэг
.
