Хуваарь ёсоор УИХ дахь МАН-ын бүлэг өнөөдөр хуралдах байсан ч хуралдаагүй. Харин АН-ын бүлэг хуралдаж, АН-аас Ерөнхийлөгчийн сонгуульд нэр дэвшигч Х.Баттулга сонгогдсон тохиолдолд ард иргэдээ зээлийн дарамтаас гаргах тухай асуудлыг хэлэлцсэн. Энэ талаар Бүлгийн дарга Д.Эрдэнэбат "Иргэдээ зээлийн дарамтаас гаргана гэдгийг олон нийт янз бүрээр хүлээн авч байна. АН энэхүү санаачилгыг гаргаж байгаа юм.

Уг санаачилгаа нэр дэвшигчдээ танилцуулж ялалт байгуулсан тохиолдолд хэрэгжүүлж ажиллахыг санал болгосон. Мөн үүний дагуу АН-ын бүлэг хууль санаачлах болно. Малыг малчда, орон сууцыг оршин суугчид нь олгох гэх мэт олон санаачилгыг АН гаргаж байсан. Энэ удаад иргэдээ зээлийн дарамтаас салгах санаачилга гаргаж байгаа нь энэ. Уул уурхайн баялгаас олж байгаа орлогын ашгаар иргэдээ зээлийн дарамтгаас гаргах боломжтой" гэсэн юм. Тэгвэл УИХ дахь МАН-ын бүлэг өнөөдөр хуралдаагүй шалтгаан нь тус Удирдах зөвлөл нь Төрийн ордонд хуралдсантай холбоотой гэх мэдээлэл байна.

Тус зөвлөлийн хуралдаанаар УИХ дахь АН-ын бүлгээс Иргэдийг өрийн дарамтаас гаргах санаачилгыг дэмжиж хууль санаачилна гэж мэдэгдсэнтэй холбоотой асуудлыг хэлэлцсэн гэх. Учир нь, Монгол Улсын Ерөнхийлөгчийн дахин санал хураалт ирэх баасан гаригт болно. Сонгууль болох гэж буй энэ эгзэгтэй цаг үед өрсөлдөгч намаас нь ард иргэдэд нөлөөлсөн мэдэгдэл гаргасан нь сонгуулийн дүнд нөлөөлөх вий хэмээн болгоомжилж байгаа бололтой.