Монгол Улсын Ерөнхийлөгчийн сонгуульд МАН өвдөг шороодож, улмаар тус намд багагүй бужигнаан үүсээд буй. Нам доторх хэрүүлээ тогоон дотроо цэгцэлж дөнгөдөг байсан ах намынханы хэрүүл тогооноосоо хальж, төв байрныхаа гадна гараад нэлээд удаж байна.

Урин дулаан эхлэхтэй зэрэгцэн жагсагчдын хөлд дарагдаад байсан Тусгаар тогтнолын ордон өдгөө намын гишүүдээр өнгө нэмээд байгаагийн шалтгаан нь төрийн эрхийг хууль бусаар авах оролдлого хийсэн, намынхаа нэр хүндийг унагасан 60 тэрбумын эздэд хариуцлага тооцох явдал. Тодруулбал УИХ-ын гишүүн, МАН-ын Шинэчлэл, хөгжлийн хорооны дарга Т.Аюурсайхан, УИХ-ын гишүүн Ж.Энхбаяр, Л.Оюун-Эрдэнэ болон МАН-ын гишүүд “60 тэрбумаас намаа цэвэрлэе” хөдөлгөөнийг байгуулан, улмаар тэмцлийн хэлбэрийг сонгож, суулт хүртэл зарлаад амжсан.

Тэгвэл хэдхэн хоногийн өмнө УИХ-ын гишүүн Ж.Энхбаяр өөрийн цахим хуудсаараа дамжуулан намынхаа удирдлагуудад шаардлага хүргүүлэв. Тэрбээр “МАН-ын дарга М.Энхболд, Ерөнхий нарийн бичгийн дарга Д.Амарбаясгалан болон намын удирдах зөвлөлд:

Алдаа оноогоо дотроо шийдвэрлэж чаддаг өөрийн гэсэн мөрдөх дүрэмтэй, баримтлах зарчимтай нам бол “Монгол Ардын Нам” билээ. Улс орны хувь заяаг энэ чухал цаг үед үүрч байгаа улс төрийн хүчний хувьд бид өнөөдөр өмнөхөөсөө илүү хариуцлагатай, бусдаас илүү сахилга баттай байх ёстой. Иймээс намын удирдлагууд наадам, зугаалгаа одоо зогсооё! Намрын их ажлаас өмнө намын дотоод асуудлаа түргэн шуурхай эмхлэх нь зүйтэй.

Гадна жагсаж байгаа нь ч дотор суугаа нь ч асуудалд бодитой хандаж шат шатандаа алдаа оноогоо ярилцъя. Төрийн эрх барьж байгаа улс төрийн хүчний нуруун дээр улс эх орон, ард түмний хувь заяа байдаг учир өнөөдөр МАН-ын дотоод асуудал ард түмэнд хамаатай гэдгийг бүх шатандаа ухамсарлая. Намын удирдах зөвлөл яаралтай хуралдаж, бага хурлыг 08-р сарын 10-ны дотор хуралдуулж дотоод асуудлаа цэгцлэхийг нийт гишүүдийнхээ өмнөөс шаардаж байна” хэмээн бичсэн нь олны анхаарлыг татав.

Уг нь МАН-ын Удирдах зөвлөл Үндэсний их баяр наадмын өмнө буюу долдугаар сарын 8-нд хуралдаж, намын бага хурлыг 9 дүгээр сард хийхээр товлосон гэдгийг намын дарга М.Энхболд нь цахим хуудсаараа дамжуулан олон нийтэд мэдээлсэн.  

Гэтэл Ж.Энхбаяр гишүүн бага хурлыг 8 дугаар сарын 10-ны дотор хуралдуулахыг шаардаж байгаа нь намын удирдлагыг гартаа авахаар яарч байгаагийн илрэл үү эсвэл үнэхээр намаа шинэчилж, дараа дараагийн сонгуульд ялагдал хүлээж лааз өшиглөхгүйн тулд ийнхүү тэвдэж байна уу гэдэг нь олон хүний эргэлзээг төрүүлээд байгаа юм. Ямартай ч МАН-ын дотоод асуудал хурцсан энэ үед Ж.Энхбаяр гишүүний шаардлага ч багагүй тос болж байгаа бололтой.

24tsag.mn