МАН 60 тэрбумын хэрэг буюу 90 минутын бичлэгийг Монгол Улсын Ерөнхийлөгч Х.Баттулга Авлигатай тэмцэх газрын дарга тэргүүн комиссар Х.Энхжаргал, дэд дарга эрхэлсэн комиссар Ц.Нямдорж нарыг хүлээн авч уулзах үеэрээ шалгах явц удаашралтай байгааг шүүмжилж, уг баримтад нухацтай хандахыг сануулсан.

Мөн Эрүүгийн хуулийн тусгай ангийн 22.4-р зүйлийн 5 дахь хэсэгт зааснаар хэрэг бүртгэлтийн хэрэг нээж, хэрэг бүртгэлт явуулахыг"  Авлигатай тэмцэх газарт даалгасан.  Уг хэрэгт Авлигатай тэмцэх газар,  Тагнуулын Ерөнхий газар, Цагдаагийн Ерөнхий газрын хамтарсан ажлын хэсэг томилон шалгуулахаар шийдвэрлэж, хамтарсан ажлын хэсэг томилсон тогтоол гаргаж, мөрдөн шалгах байгууллагуудад хүргүүлсэн юм.  Тэгвэл УИХ-ын дарга М.Энхболд, Монгол Ардын Намын хорооны дарга Ц.Сандуй, зөвлөх А.Ганбаатар нарыг хууль хяналтын байгууллагаас хэрэг үүсгэн шалгаж эхэлсэн талаар зарим мэдээллийн хэрэгслүүд мэдээлжээ. Ингэхдээ зөвлөх А.Ганбаатарыг АТГ-аас баривчлан саатуулж, Ганц худагт хорин мэдүүлэг авч эхэлсэн хэмээсэн. Харин энэ мэдээллийг албаныхан үгүйсгэлээ. 60 тэрбумын асуудлаар зөвлөх А.Ганбаатарыг хорьсон гэдэг нь ташаа мэдээлэл бололтой.