УИХ дахь МАН-ын  бүлгийн гишүүд мэргэжлийн Засгийн газрыг огцруулах хүсэлтээ УИХ-д өргөн барьсан. Эл асуудлаас үүдэлтэй үнэн, худал нь мэдэгдэхгүй мэдээллүүд саарал ордны булан тохойгоор нэг “хийссэн”. Засгийн газрын огцруулах тухай өргөх бичгийг нэр бүхий 30 гишүүн УИХ-ын дарга М.Энхболдод өргөн барих гэсэн авч мань дарга тэднээс бултчихаад олдоогүй.  Гишүүд нь эрэл сурал хийсэн боловч  эрүүл мэндийн шалтгааны улмаас гадаад яваа гэх хариуг хэн нэгэн албан тушаалтан тэдэнд өгсөн байнаа гэх.

Тиймээс нөхдүүд УИХ-ын дэд дарга Ц.Санжмятавт өгсөн дуулдана. Өөрийн намын УИХ-ын дэд даргадаа энэ бичгээ барьж болох байсан ч Засгийн газрыг огцруулах хүсэлтэд өөрийнх нь гарын үсэг тууж яваа учир “зөрчилтэй” гэж үзсэн үү. Ямартай ч Ц.Санжмятавт гардуулж өгсөн харагдсан.

Ийнхүү албан бичиг очих газраа нэгэн оччихсон болохоор дараагийн асуудал яригдах нь мэдээж. МАН-ын 30 гишүүн Засаг огцруулах санаархалаа АН-гүйгээр хийж чадахгүй. Тэдний дэмжлэгтэйгээр санасандаа хүрч, дараагийн ээлжнийхэн хоолондоо орно. Гэвч тэдний хоолноос АН-ынхан хуваалцах нэгэн хувилбар яригдаад буй. Өөрөөр хэлбэл дараагийн Засгийн газар Хамтарсан Засгийн газар байх магадлал тун өндөр байгаа юм.

Тэгвэл УИХ дах АН-ын бүлэг Ерөнхий сайдыг огцруулах талаар хуралджээ. Улмаар тус асуудал хөнгөн хандаж болохгүй хэмээн үзэж ажлын хэсэг байгуулсан байна. Уг  асуудлыг судалж үзэх, санал дүгнэлт боловсруулах ажлын хэсгийг УИХ-ын гишүүн Л.Болдоор ахлуулан байгууллаа гэж УИХ дахь Ардчилсан намын бүлгийн ажлын албанаас мэдээлсэн. Үүнээс үзэхэд Хамтарсан Засаг байгуулагдах эсэх нь УИХ-ын гишүүн Л.Болдоос шалтгаалах нь байна.