Мэргэжлийн тодотголтой Засгийн газар байгуулагдаад нэг жил гаруйн нүүрийг үзэж байгаа ч хэдийнэ ч суурь ганхаж эхлээд байгаа. Өнгөрсөн долоо хоногт МАН-ын 30 гишүүн Засгийн газрыг огцруулахаар гарын үсэг зурж, саналаа  УИХ-ын дэд даргад өргөн барьсан. Харин өнөөдөр Төрийн байгуулалтын байнгын хорооны хуралдаанаар Засгийн газрын асуудлыг хэлэлцэх юм. Тэгвэл Мэргэжлийн Засгийн газрыг огцруулах талаар хэн юу хэлснийг багц 24 буландаа онцолж байна.

Монгол Улсын 15 дахь Ерөнхий сайд Ш.Гунгаадорж: Засгийн газраа тогтвортой байлгамаар байгаа юм. Засгаа огцруулна гэдэг тийм ч хүсээд байх зүйл биш. Хэн Засгийн газрын тэргүүн, сайд байх нь хамаагүй. Нэгэнт нам дотроо яриад Засгийн газраа байгуулан үүрэг чиглэлээ өгөөд ажилласан бол нэг жил гэдэг эцсийн дүн тавьчих хугацаа биш шүү дээ. Эхний зургаан сард ОУВС-тай хэлэлцээ хийх, гэрээний нөхцөлүүдээ эргэж харах гэхчлэн бужигнаад өнгөрсөн. Үндсэндээ 6-7 cap л ажил явлаа. Өнөөдөр Засгийн газраараа оролдож шуугиад байх нь миний бодлоор, 60-аад жил энэ намд үнэнч яваа гишүүний хувьд сайхан харагдахгүй байна. Цаашаа од гийгээд, сайхан болчихно гэж бодоход ч бас түвэгтэй байна. Парламентад олонх болж, засгаа дангаараа бүрдүүлж жил тойрон ажиллачхаад огцруулъя гэдэг нь сайны Дохио биш. Үлдэж буй хугацаа хэр билээ. 2020 он гэж ярьж буй ч хэрэг дээрээ 2018 он шүү дээ. 2019 онд ажил дутуу, хөтүүхэн явсан болоод сонгууль эхэлчихнэ. Эд бүгдийг эргэцүүлж, том утгаар харж хэлэхэд, өнөөдөр засгаар оролдох цаг биш. Харин яаж ажлаа сайжруулах вэ, энэ засгийг яаж шахаж ажиллуулах вэ, ямар шаардлага байна. Магадгүй зарим сайд ажлаа муу хийж байгаа бол түүнийг огцруулж, Засгийн газартаа нэлээд хатуу чиг үүрэг өгч явах ёстой байх.

АН-ын дарга С.Эрдэнэ: Монгол Улсын нийгэм эдийн засагт бодит дүгнэлт хийх хэрэгтэй байна. Хямралын уг үндэсийг зөв тодорхойлох  нь чухал. Үүнийг яаж шийдэх вэ гэдэг чухал болохоос аль нэг Засгийн газар огцрох эсэх нь чухал биш. Манай УИХ дахь АН-ын бүлгийн байр суурь ийм л байна. Эрх баригчид Засгийн газраа өөрчилж солих нь тэдний дотоод асуудал.
АН-ын хувьд аль нэг Засгийн газрыг огцруулах нь бидний гол зорилго биш.  Үнэмлэхүй олонх байгаа намын хувьд Засгийн газраа хэд огцруулж, солих нь тэдний өөрсдийнх нь асуудал. Манай намын оролцоогүйгээр асуудлаа шийдэх эрх мэдлийг сонгогчид өгчихсөн. Энэ том эрх мэдлийг яаж удирдаж авч явах нь тэдний л асуудал. Харин манай намын хувьд нийгэм эдийн засгийн зөв бодлого явуулаасай, зөв алхам хийгээсэй л гэж хүснэ. Аль нэг Засгийн газрыг огцруулах тал дээр ура хашгираад алга ташаад явах шаардлага бидэнд алга.  Ганц нэг сайдын суудал авах ч юм уу бидэнд ашигтай нөхцөл бололцоог байх эсэхийг бид хараагүй. Хүчтэй сөрөг хүчин байх, шүүмжлэлийг зөв явуулах тал дээр л бид анхаарлаа хандуулна.   УИХ дахь АН-ын бүлэг энэ талаар хуралдана. Нэгдсэн байр суурь илэрхийлнэ. Одоогоор АН-д ч тэр, бүлэгт ч тэр ямар нэгэн санал ирээгүй байна.

Хууль зүй, Дотоод хэргийн сайд С.Бямбацогт: Засгийн газрыг огцруулах асуудлыг Улсын Их Хурал дахь сөрөг хүчин биш нэг зорилго, нэг үйл хэргийн төлөө зүтгэж яваа бүлгийн нөхдөөс маань гаргаж тавьсныг гайхширч байна. Манай намд өрөөлийн өрдсөн түймрийг унтраахын оронд үлээж хөгжөөгөөд байгаа нь тун ч зохисгүй байна. Ингэж байж “Жоомоо алах гээд байшингаа шатаав” гээчийн үлгэр болчих вий дээ. Үүнээс болж бусдын идэш, хоноцын хэвтэш болж хохирох вий гэдгээ ер нь бодож үзсэн л байгаа даа. Улс гэрээ нурааж тоглох ямар хортойг өмнөх эрх баригчдын үед та бид хангалттай амссан. Тэр алдааг засч, ачааг үүрнэ гэж итгэсэндээ л ард түмэн МАН-д 65 суудал өгсөн гэдгийг хэзээ ч мартаж болохгүй.

Гэнэтхэн тэнгэрээс буусан юм шиг бардам аашилж, гэрээ нурааж тоглох нь яавч олигтой зүйл биш. Ерэн зургаан жилийн түүхтэй энэ том намд өөрийн дүрэм, тогтсон дэг жаяг гэж бий. Аливаа асуудлыг шийддэг эрэмбэ дараалал гэж байгаа. Хөсөг хөтлөх хүн нь тодроогүй байхад гэрээ буулгаж тэргэнд ачаалах ямар хэрэг байгаа юм бэ? гэдгийг л бүлгийнхээ гишүүдэд хэлж байгаа юм. Удахгүй намын Бага хурал болж, улмаар намын Их хурлын товыг тэндээс зарлана. Харин намын Их хурлаас намын шинэ даргаа сонгох нь тодорхой шүү дээ. Тэр шинэ хүн нь хэн болдог юм тэр нь л Засгийн газраа тэргүүлээд, төрийн бодлогоо хэрэгжүүлээд явна биз.

УИХ-ын гишүүн Т.Аюурсайхан: Засгийн газар хүүхдийн мөнгийг хүүхэд болгонд ижил тэгш олгохгүй байх шийдвэр гаргасан. Сонгуулийн үеэр Монголын төрд шударга ёсыг тогтооно гэсэн. Гэтэл нэг жилийн дотор хэнд ч хариуцлага тооцсонгүй.  Монголбанк, Хөгжлийн банкны асуудалд мөн л хайнга хандлаа. Оффшорын тухай хууль анх өргөн баригдахдаа оффшорчдыг хамгаалсан хууль болсон. Энэ хуулийг Засгийн газраас өргөн барьсан. Засгийн газраас энэ мэт олон хууль тогтоомжийг ард түмний биш цөөн хэдэн бүлэглэлийн эрх ашигт нийцүүлэн баталж шийдвэр гаргалаа.  Мэргэжлийн гэх тодотголтой Засгийн газар байгуулагдсан цагаасаа боловсон хүчний сонголт, томилгоонд алдаа гаргаж, Засгийн газрын бодлогын нэгдэлгүй, тодорхойгүй байдал, тооцоо судалгаа муутай эргэж буцсан шийдвэрүүд, цөөн хүн, хуулийн этгээдийг дэмжсэн явцуу үйл ажиллагаатай байна. Засгийн газар удаа дараа эрхээ хэтрүүлж Улсын Их Хурлын бүрэн эрхэд халдсан учраас огцрох нь зүйтэй.

УИХ-ын гишүүн Л.Оюун-Эрдэнэ: Ард түмний 70 хувь нь Засгийн газар хангалттай ажиллахгүй байна гэсэн судалгаа гарсан. УИХ бол ард түмнээс сонгогдож гарч ирсэн бага ард түмэн байдаг. Тиймээс ард түмэн өөрөө Засгийн газар дүн тавьсан байхад цаг алдахгүйгээр өөрчлөхгүй бол 2020 онд ард түмэн ямар дүн тавина гэдэг тодорхой болчихлоо. 65 суудалтай Засгийн газар бол дөрвөн жилээр биш 20-25 жилийн томоохон  реформ хийх, эдийн засгийн тэргүүлэх чиглэлийг тодорхойох хурдтай, далайцтай, зангарагтай, хүчтэй байх ёстой. Гэтэл танил тохой татсан хэсэг бүлэг хүмүүсийн хүрээнд бий болсон Засгийн газар боллоо. АН өнгөрсөн дөрвөн жил авлигын алдаа гаргасан байхад нэг ч хүнд хариуцлага тооцож чадсангүй. Цэцэрлэг хүрэлцэхгүй байхад Засгийн газрын нэр бүхий 4-5 сайд 802.8  тэрбум төгрөгийн концессыг өөрсдийнхөө нэрийн компани дээр авч байгаа нь АН-аас юугаараа ялгаатай байгаа юм бэ. Сүүлдээ тойрог дээрээ очоод хүний нүүр харж чадахгүй боллоо. Шударга ёсыг тогтооно гэж Хэнтий аймгийн сонгогчиддоо хэлж гарч ирчихээд нүдний өмнө хээл хахууль, шударга бус хуйвалдаан болж байхад зүгээр хараад сууж чадахгүй.Бид алдааг бусдаас биш өөрсдөөсөө хайх хэрэгтэй. Эргэж буцсан шийдвэрүүдээ харах хугацаа байсан. Тиймээс гомдох хэрэггүй. Яаралтай дараагийн Засгийн газрыг байгуулах ёстой. Олон улсад Засгийн газрын рейтинг 50-иас доош хувьтай болоод ирвэл өөрийн хүсэлтээр огцордог. Манай Засгийн газарт ард түмэн дүнгээ өгсөн. Одоо ард түмнээсээ уучлалт гуйгаад огцрох ёстой гэж үзсэний үндсэн дээр гарын үсэг зурсан.

УИХ-ын гишүүн Ц.Гарамжав: Манай нам дараалласан хоёр сонгуульд ялагдал хүлээлээ. МАН амлалтаа биелүүлэхгүй байгаа нь үүнээс  харагдсан. Ард түмэн хамгийн том шүүгч байдаг. Тиймээс бидэнд дүнгээ тавьсан.  Засаг төр өөрсдийн амласан хөтөлбөрийн хэмжээнд үйл ажиллагаагаа хэрэгжүүлж яадахгүй байгаа нь харагдсан байгаа учраас бодлогоо шинэчлэх ёстой гэдэг дээр санал нэгдсэн. Би ямар нэгэн албан тушаал бодож энэ албан бичигт гарын үсэг зураагүй. Албан тушаал надад хэрэггүй. Үнэхээр шаардлагатай бол л хийнэ. Ер нь хувийн эрх ашгийн үүднээс  энэ асуудалд хандсан хүн эдгээр гарын үсэг зурсан хүмүүсийн дотор нэг ч байхгүй. Бүгд л улс орныхоо төлөө санаа зовсон хүмүүс. Манай намд улс орноо боддог гишүүд байгаад баяртай байна.

УИХ-ын гишүүн Ж.Энхбаяр: Маш олон хүүхэд цэцэрлэггүй, гэртээ байна. Сургууль гурван ээлжэээр хичээллэсэн хэвээр байна. Гэтэл Засгийн газрын гишүүд хувийнхаа компани руу зам тавьж, эрчим хүч татдаг. Концесс нэрээр 800 гаруй тэрбум төгрөгийг Засгийн газар дотроо хувааж, зарцуулж байгаатай эвлэрч чадахгүй. Цалин, тэтгэвэр нэмэгдээгүй. Монгол төрийг худалдсан 60 тэрбумын шившигтэй явдал. Монголчууд төрөө мөнгөөр худалддаг бол төрд итгэдэг үнэт зүйл нуран унана. Монголын ард түмэн хаашаа хандах юм. Итгэж байсан төр нь, найдаж 65 суудал өгсөн МАН нь иргэдийн итгэлийн мөнгөөр үнэлж, зарж байгаа нь туйлын ноцтой, үндэсний язгуур эрх ашгийг зөрчсөн, төрийн эсрэг гэмт хэрэг. Үүнийг цэвэрлэх цаг нь болсон. УИХ-ын 30 гишүүн гарын үсэг зурсан нь асар том хүч. Улс орноо эрүүлжүүлж, монгол төрөө цэвэрлэж авахгүй бол ёроолгүй хямрал руу унах болно. Би сонгуулиар сонгогчдодоо амлалт өгсөн. Би УИХ-ын гишүүнийхээ үүргийг нэр төртэй, хариуцлагатай гүйцэтгэнэ. Надад ямар нэг албан тушаал, эрх мэдэл сонин биш. 

24tsag.mn