УИХ-ын нэр бүхий гишүүд засгийн газрыг огцруулах бичгийг УИХ-д өргөн бариад байгаа билээ. Тэгвэл УИХ-ын чуулганы хуралдааны дэгийн тухай хуулийн 38.1-т зааснаар Ерөнхий сайдыг огцруулах саналыг УИХ-д өргөн мэдүүлснээс хойш 7 хоногийн дотор Төрийн байгуулалтын байнгын хороо хэлэлцэж, санал дүгнэлт гаргах заалттай.

Харин нэгдсэн хуралдаанаар Төрийн байгуулалтын байнгын хорооны санал, дүгнэлт гарснаас хойш 7 хоногийн дотор хуралдаж, шийдвэрлэх ёстой. Тэгвэл Төрийн байгуулалтын байнгын хорооны хурал 17 цагт зарлагджээ. Байнгын хорооны хурал өнөөдөр 14 цагт товлогдсон байсан ч МАН-ын бүлгийн шийдвэр гараагүй учраас хойшлогдсон юм. Тэгэхээр МАН-ын бүлэг Засгийн газрыг хэрхэх эсэхээ 17 цагт танилцуулахаар болсон байна.

  УИХ дахь МАН-ын бүлгийн хуралдаан өчигдөр буюу наймдугаар сарын 29-ний 15:00 цагаас эхэлж 22:00 цагт завсарлаж, өнөөдөр 13:00 цагийн үед үргэлжлүүлэн хуралдаж эхэлсэн.  Улмаар завсарлаж, 15.00 цагаас үргэлжлүүлэн хуралдахаар болсон юм.  МАН-ын бүлэг хуралдаанаараа Засгийн газрыг огцруулах эсэхээ эцэслэх учраас анхаарал татаж байна. Бүлгийн хуралдааны явц, хэлэлцэж буй асуудлуудын талаар албан ёсоор ямар ч тайлбар, хэвлэлийн хурал хийгээгүй байгаа юм.