МАН-ын байгуулсан гэхээсээ илүү М.Энхболдын байгуулсан Засгийн газрын хувь заяа бүрхэг болсон. Гэхдээ нам дотроо ойлголцож чадаагүй бол шүү дээ.  Улс төрд ах дүүгийн харилцаа тун дээгүүр яригддаг. Улс төрд анх оруулж, гарыг нь ганзаганд хөлийг нь дөрөөнд хүргэсэн хүмүүсийгээ мартаж чаддаггүй нь өнөөгийн улс төрд тахал болчихоод буй. Нэг удаагийн ач санаж өгсөн албан тушаал, авлига нь дөрвөн жил үргэлжилж, дараагийн дөрвөн жилийнхээ үндэс суурийг баттай гэгч нь тавьчихдаг тул төрийн алба төрлийн алба болтлоо өмхийрөөд байгаа нь нууц биш.

Энэ л ах дүүгийн холбоо яг одоо МАН-д үйлчлэлээ бий болгож, дүү нь ачит ахынхаа хэрэг болоод хэргэм зэргийг нь өөрөө туг тахиж үлдээх шийдвэрт хүрчээ. Өчигдөр орой нийслэлийн МАН-ын дарга, НИТХ-ын дарга Ц.Сандуй өөрийн хүсэлтээр ажлаасаа чөлөөлөгдөх хүсэлт гаргасан байна. Ингэхдээ  “2012 онд хөсөр хаягдсан нийслэлийн МАН-ын хороог авч 2013 оноос хойш тасралтгүй ялалт байгуулсан. 2016 онд таамаглаагүй ялалтыг авчирсан ч 2017 оны Ерөнхийлөгчийн сонгуулиар нийслэлийн дүүргүүдэд ялагдсан. Тиймээс хариуцлагаа ухамсарлаж, нийслэлийн МАН-ын хорооны даргын албан тушаалаасаа татгалзаж  байна. 60 тэрбумын хэрэгт гурав дахь удаагаа шалгагдаж буй. Гэхдээ уг хэрэгт холбоогүй учир өмнө ажлаа өгч шалгуулахаа намынхандаа хэлж байсан. Гэвч намын удирдлага зөвшөөрдөггүй байв. Харин энэ удаад тэд зөвшөөрөхгүй  ч, НИТХ-ын даргын суудлаа өгч, хэрэгт буруугүй гэдгээ тогтоолгоно” гэжээ. Ц.Сандуйг хэзээний М.Энхболдын хүн гэдэг. Түүнийг газрын наймаагаар гаршиж зузаарсныхаа дараа хотод үлдээсэн гар хөл нь Ц.Сандуйг гэх юм билээ. Тиймдээ ч өнөөдөр тэрбээрээ өөрөө туг тахиж, ганхаад байгаа намын даргын суудал, Засгийн газрыг нь авч үлдэхээр санаархаж буй бололтой.

Үнэндээ М.Энхболдын байдал хүндрээд буй. “60 тэрбум”-ын хэрэгт хэчнээн холбогдолгүй гэж мэдэгдэв ч  гарч буй дуу хоолой нь түүнийх биш гэчих вий гэсэн шиг адилхан дуулаад байгааг АТГ болон Тагнуулын Ерөнхий газар, Цагдаагийн ерөнхий газрын хамтарсан ажлын хэсгийнхэн шалгаад эхэлчихсэн. Бүр түүнээс тайлбар, мэдүүлэг хүртэл авсан гэж байгаа. Нөгөө талаар Ерөнхийлөгчийн сонгуульд ялагдсны хариуг намынхан түүнээс нэхэж буй. Ийм их хэмжээний хөрөнгө, мөнгө зарсан сонгуулийг өмнө нь хэзээ ч харж байсангүй хэмээн намын генсек Д.Амарбаясгалан нь мэдэгдсэн удаатай. Тиймээс түүнээс дор хаяж дарга гэх нэг сэтрийг нь  авч байж санаа амарна. Ядаж байхад У.Хүрэлсүх түүнтэй дайн зарлачихсан. Намын даргынхаа төлөө итгэл төгс өрсөлдөнө гэдгээ зарлачихсан. Ийм л эгзэгтэй үед  М.Энхболд ахынхаа аминд Ц.Сандуй дүү нь орох нь тэр.

Гэвч түүний төлөвлөгөө бүтэх эсэх нь эргэлзээтэй. УИХ-ын 32 гишүүн түүний эсрэг талд байгаа.  Хэрэв тэд Засгийн газрын эсрэг санал өгч, намыхаа Их хурлаар М.Энхболдыг “хусчихвал” түүний ноёрхол эцэслэгдэнэ. Гэхдээ энэ бол тохиролцоогүй үеийн нөхцөл байдал. УИХ дахь МАН-ын бүлгийн хурал асуудлыг ихэд нухацтай үзэж байгаа талаар гишүүд нь цухуйлгасан. Тэгэхээр тэд Ц.Сандуйгаар туг тахиж, Засгийн газрыг авч үлдэх тохироо хийсэн ч байж магад. Ямартай ч Ц.Сандуй ийнхүү эхний алхамаа хийчихлээ.

Б.Өрнөх